Harry Kane shënoi në ndeshjen e nëntë radhazi në Ligën e Kampionëve, por dy golat e tij nuk mjaftuan, pasi Vikingu ia mohoi fitoren Bayern Munichut me 10 lojtarë, duke barazuar rezultatin në minutën e 90-të në një përballje emocionuese që përfundoi 3-3.
Pasi skuadra e tij pësoi gol brenda tetë sekondave në barazimin e së shtunës kundër Augsburgut, trajneri i Bayernit, Vincent Kompany, me siguri ishte tejet i zhgënjyer kur pa ekipin e tij të pësonte sërish një gol të hershëm në këtë ndeshje.
Akrepët e orës sapo kishin kaluar minutën e parë kur shtatlarti Gianni Stensness e goditi topin me kokë drejt tokës, pas harkimit nga këndi të Zlatko Tripicit, duke e dërguar atë në rrjetë, përtej portierit Jonas Urbig, i cili u përpoq ta ndalte.
Portieri kundërshtar, Arild Ostbo, u desh të ndërhynte shpejt për të ndalur Michael Olisen dhe Luis Diazin në vazhdimësi, ndërsa mysafirët kërkonin një reagim të menjëhershëm.
Vikingu vazhdoi t’i përballonte periudhat e gjata të presionit nga Bayerni, por tregoi gjithashtu gatishmëri për të sulmuar me shpejtësi sa herë që e rikthente posedimin e topit. Ky plan loje u zbatua në mënyrë të përkryer në minutën e 38-të, kur vendasit e avancuan topin me shpejtësi dhe krijuan hapësirën që Peter Christiansen të depërtonte pas mbrojtjes dhe të realizonte me qetësi përballë Urbigut.
Kështu, vendasit shkuan në pushim me një epërsi të jashtëzakonshme prej dy golash, të cilën as tifozët më të zjarrtë të Vikingut nuk do të mund ta kishin parashikuar.
Në anën tjetër, një gol i Kane ishte diçka shumë më e parashikueshme dhe ai erdhi brenda 10 minutave të para të pjesës së dytë. Sulmuesi anglez ekzekutoi një penallti me një goditje të ulët, jashtë mundësive të portierit, pasi Kristoffer Haugen u ndëshkua për një ndërhyrje të vonuar ndaj Konrad Laimerit.
I frymëzuar nga goli i tij i 80-të në garat e klubeve të UEFA-s, Kane shënoi shumë shpejt edhe golin e 81-të, duke e shuar epërsinë e Vikingut. Ai realizoi me kokë në shtyllën e dytë, pas harkimit të Joshua Kimmichut.
Me vendasit nën presion të madh, kapiteni i Anglisë e tregoi më pas edhe cilësinë e tij në krijimin e rasteve, duke dërguar një top të peshuar në mënyrë të përkryer në zonë. Laimer e pasoi topin për Diazin, i cili shënoi nga afërsia dhe e përmbysi rezultatin.
Megjithatë, gëzimi për përmbysjen dramatike u zbeh shpejt nga kartoni i kuq i panevojshëm i Olises, i cili u përjashtua pas dy kartonëve të verdhë të marrë brenda një kohe të shkurtër. Kartoni i dytë iu dha për shkak se e goditi Tripicin në fytyrë me topin.
Përjashtimi i francezit i dha energji të re kampionit norvegjez, i cili e shpëtoi një pikë përmes goditjes me kokë të Herman Haugen në shtyllën e dytë, pas krosimit të gjatë të Tripicit.
Goli shkaktoi festë të madhe te vendasit, të cilët siguruan pikën e tyre të parë në fazën e ligës, ndërsa Bayernit ia mohuan fitoren e dytë radhazi në garat evropiane.
