Manchester City shënoi fitore të madhe ndaj West Ham United me rezultat 4:1, e në anën tjetër, Chelsea u ndal me barazim nga Crystal Palace.
Qytetarët më në fund kanë rigjetur formën e tyre, pas një kohe shumë të keqe të kaluar, tani duke shijuar fitoren e dytë radhazi.
Skuadra e Pep Guardiolës e dominoi takimin ashtu siç pritej, duke siguruar fitoren shumë herët.
Goli i parë erdhi në minutën e 10-të, kur Coufal shënoi autogol, për 1:0.
Erling Haaland e dyfishoi epërsinë tre minuta para fundit të pjesës së parë dhe me rezultatin 2:0 u mbyll pjesa e parë e takimit.
haaland gives double lead 2-0pic.twitter.com/3Wr5SbkH2D
— Goals Xtra (@GoalsXtra) January 4, 2025
Ylli norvegjez e shënoi golin e dytë personal në minutën e 55-të, për rezultatin 3:0, i asistuar nga Savinho.
Tre minuta më vonë, Foden, realizoi për 4:0, me Kevin De Bruynen në rolin e asistuesit.
Krejt çfarë West Ham bëri në këtë takim ishte goli ngushëllyes për 4:1 i shënuar nga Fullkrug në minutën e 71-të.
Manchester City me këtë fitore shkon në kuotën e 34 pikëve pas 20 ndeshjeve, duke mos lëvizur nga pozita e gjashtë.
Në anën tjetër, Chelsea, që e nisi sezonin shumë mirë, ka hyrë tashmë në një krizë rezultatesh, pasi nuk ka fituar në katër takimet e fundit.
Londinezët barazuan 1:1 me Crystal Palace, ndonëse kaluan shumë herët në epërsi.
Cole Palmer shënoi për skuadrën e Enzo Marescës në minutën e 14-të për 1:0.
Mateta barazoi tetë minuta para fundit, me ndeshjen që përfundoi 1:1.
Chelsea pas këtij barazimi, vazhdon të mbetet në vendin e katërt, por e humb hapin me pjesën e epërme të tabelës.
