Mohamed Salah po përjeton një pritje të jashtëzakonshme në Turqi, ku ndikimi i tij te Trabzonspori po shkon përtej fushës së futbollit.
Komuna e Yomras, në qytetin e Trabzonit, ka vendosur që një rrugë të marrë emrin e yllit egjiptian, në shenjë mirënjohjeje për rëndësinë që ai ka fituar te tifozët dhe banorët e zonës.
Sipas mediave turke, procedurat e nevojshme janë përfunduar dhe është marrë edhe miratimi i Ministrisë së Jashtme të Turqisë.
Tani pritet përgatitja e tabelave me emrin e futbollistit dhe organizimi i ceremonisë së inaugurimit.
Vendimi u miratua unanimisht
Kryetari i komunës së Yomras, Mustafa Beyik, shpjegoi se ideja lindi si një mënyrë për të nderuar ndikimin e Salahut dhe entuziazmin që ardhja e tij ka krijuar në qytet.
Propozimi u paraqit para këshillit komunal dhe mori mbështetjen e të gjithë anëtarëve, pa asnjë kundërshtim.
Më pas nisën procedurat ligjore, pasi rregullat në Turqi kërkojnë miratimin e Ministrisë së Jashtme për emërtimin e rrugëve me emra të personaliteteve të huaja.
Sipas Beyikut, miratimi erdhi brenda vetëm një jave, një kohë relativisht e shkurtër për procedura të tilla.
Vendimi tashmë është konfirmuar zyrtarisht, ndërsa komuna po përgatitet për vendosjen e tabelave.
Salah i lumtur me nderimin e veçantë
Sipas kryetarit të komunës, drejtuesit e Trabzonsporit ia kanë përcjellë lajmin Salahut përmes anëtarëve të bordit drejtues. Futbollisti ka shprehur kënaqësinë e tij për këtë nderim.
Rruga ka edhe një domethënie të veçantë për egjiptianin, pasi ndodhet në zonën ku ai jeton dhe në itinerarin që përdor gjatë rrugës për në shtëpi.
Kështu, Salah pritet ta shohë shpesh emrin e tij në tabelat e rrugës.
Beyik bëri të ditur se komuna synon ta ftojë zyrtarisht futbollistin në ceremoninë e inaugurimit, e cila pritet të zhvillohet brenda 20 ditësh.
Sipas autoriteteve lokale, ky është një rast i paprecedentë për zonën, pasi për herë të parë një rrugë në Trabzon do të emërtohet sipas një futbollisti të huaj.
Nderimi vjen në një periudhë kur Salah është kthyer në një figurë jashtëzakonisht popullore në qytet, pas transferimit nga Liverpooli te Trabzonspori në verën e vitit 2026. /
