Deputeti i LDK-së, Driton Selmanaj, ka thënë se sot janë bërë 500 ditë që kur Kosovës i janë vendosur sanksionet nga Bashkimi Evropian. Selmanaj thotë se këto masa janë vendosur nga vendet që dikur kanë luftuar për lirinë e Kosovës, vende që kanë bombarduar Serbinë.
Deputeti Selmanaj thotë se në vitin 2024, vendet perëndimore, përfshirë edhe SHBA-në, po nënshkruajnë marrëveshje me Serbinë, ndërkohë që Kosova gjendet nën sanksione njëjtë sikurse Rusia e Bjellorusia.
“E rëndë, e papranushme dhe me pasoja shumë të rënda për vendin tonë.Ky është Albin Kurti, kjo është qeverisja LVV-Guxo, ky është rezultati i tyre!”, ka shkruar Selmanaj.
Postimi i plotë:
KOSOVA 500 DITË NËN SANKSIONE..
Para se të vinte Albin Kurti në pushtet, do të ishte e pa imagjinueshme të besonte dikush që ndaj Kosovës do të vendoseshin sanksione nga BE.
Nuk janë 5 ditë, as 50 por 500 ditë që kur Kosova është nën masa sanksionuese nga vendet perëndimore, nga ato vende që dikur luftuan për lirinë dhe pavarësinë e Kosovës.
Këto vende në vitin 1999 e sulmuan dhe e bombarduan Serbinë, që kishte mbetur e izoluar dhe nën mbështetjen e dy vendeve me regjim jo demokratik, Rusia dhe Bjellorusia.
Me 2024 vendet perëndimore, përfshirë dhe SHBA-të nënshkruajnë marrëveshje bashkëpunimin me vlera miliardëshe me Serbinë, kurse Kosova, Rusia dhe Bjellorusia gjenden në masa sanksionuese nga BE.
E rëndë, e papranushme dhe me pasoja shumë të rënda për vendin tonë.
Ky është Albin Kurti, kjo është qeverisja LVV-Guxo, ky është rezultati i tyre!
