Ministria e Financave njoftoi dje se nuk janë ekzekutuar të gjitha pagat e punonjësve publikë në Viti, pasi sipas MF-së, Komuna nuk ka bërë korrigjimet dhe përshtatjet e nevojshme për të siguruar buxhet të mjaftueshëm për ekzekutimin e pagave të muajit shtator.
Përmes një njoftimi zyrtar, Ministria deklaroi se Thesari i ka dërguar në vazhdimësi njoftime Komunës së Vitisë, të cilëve u është dhënë mundësia gjatë gjithë ditës duke i pritur që t’i bëjnë rregullimet e nevojshme për të siguruar buxhet të mjaftueshëm për ekzekutim të plotë të pagave.
“Megjithatë, zyrtarët e Komunës së Vitisë nuk kanë reflektuar, gjë që nënkupton se kur është bërë ekzekutimi i pagave sot, sistemi me automatizëm i ka refuzuar ekzekutimet për programet që nuk kanë buxhet të mjaftueshëm. Pra, për zyrën e kryetarit, administratën dhe programet tjera sistemi ka bërë ekzekutimin e pagesave, por jo edhe për programet e arsimit fillor e të mesëm, sepse komuna nuk është siguruar që në këto dy programe ka buxhet të mjaftueshëm” deklaroi Ministria.
Lidhur me këtë ka reaguar Asociacioni i Komunave të Kosovës.
Drejtori i këtij Asociacioni, Sazan Ibrahimi, deklaroi se Komuna e Vitisë është ndëshkuar padrejtësisht nga qeveria.
Ai ka akuzuar nivelin qendror në mos bashkëpunim, duke thënë se niveli qendror ka nënshkruar kontratat kolektive dhe po i njëjti është përgjegjës për mbulimin e shpenzimeve.
