Presidentja e Kosovës Justina Shiroka Pula ka reaguar pas vrasjes së rëndë që ndodhi sot në fshatin Livoç i Ulët të Gjilanit, ku një grua dhe një burrë humbën jetën, ndërsa një person tjetër mbeti i plagosur nga të shtënat me armë zjarri.
Në reagimin e saj, presidentja ka shprehur ngushëllime për familjet e viktimave dhe ka uruar shërim të shpejtë për të plagosurin.
“Asnjë rrethanë nuk mund ta justifikojë marrjen e jetës së njeriut. Askush nuk ka të drejtë t’i ekspozojë gratë ndaj rrezikut, dhunës apo vuajtjes”, ka theksuar ajo.
Presidentja u ka bërë thirrje organeve të drejtësisë që ta hetojnë rastin me përkushtim të plotë, të zbardhin të gjitha rrethanat dhe autorët t’i sjellin para drejtësisë.
Postimi i plotë:
Me dhimbje të thellë mora lajmin për vrasjen e rëndë që ndodhi sot në fshatin Livoç i Ulët të komunës së Gjilanit, ku një grua dhe një burrë humbën jetën, ndërkaq një tjetër u plagos si pasojë e të shtënave me armë zjarri.
Në emër të institucioneve të Republikës së Kosovës dhe të qytetarëve të saj, shpreh ngushëllimet e mia më të thella për familjet e viktimave dhe shërim të shpejtë për të plagosurin.
Asnjë rrethanë nuk mund ta justifikojë marrjen e jetës së njeriut.
Askush nuk ka të drejtë t’i ekspozojë gratë ndaj rrezikut, dhunës apo vuajtjes.
Prandaj, ftoj organet e drejtësisë që ta hetojnë këtë rast me përkushtim të plotë, t’i zbardhin të gjitha rrethanat dhe t’i sjellin autorët para drejtësisë.
