Ministria e Industrisë, Ndërmarrësisë dhe Tregtisë, para 4 ditësh ka marrë një vendim për ndërprerjen e masës mbrojtëse anti-damping mbi sektorin e prodhimit të Koncentratit për shpezë dhe kafshë nga Serbia.
Këtë vendim, që e ka publikuar portali “Pa Rrotlla”, ministrja Rozeta Hajdari e ka marrë më 21 gusht, 2023, ndërsa e ka arsyetuar duke thënë se prodhimi vendor nuk e mbulon kërkesën e tregut.
“…shihet se prodhimi vendor nuk e plotëson kushtin kryesor për mbrojtje me masën Antidamping pasi që kemi ndryshim të çmimeve të ushqimit të koncentruar për shpezë dhe kafshë në treg, ku produktet serbe në Kosovë që janë shqyrtim i kësaj mase janë më të shtrenjta si dhe sasia e prodhimit të këtij produkti është më e vogël se 50% të prodhimit total të produktit të ngjashëm, pra prodhimi i këtij produkti nuk e ka plotësuar kushtin i cili parashihet në paragrafin 6 të nenit 28 të Ligjit Nr. 04L-240 për Masat Antidamping dhe masat Kundërbalancuese”.
Vendimi i datës 21 gusht është marrë në bazë të një “analize finale” të datës 29 mars të këtij viti, e cila, sipas MINT-it, “rekomandon ndërprerjen e masës mbrojtëse anti-damping mbi sektorin e prodhimit të Koncentratit për shpezë dhe kafshë” nga Serbia.
Në vendimin e nënshkruar nga ministrja Hajdari thuhet po ashtu se kërkesa do të konsiderohet që është bërë nga ose në emër të industrisë vendore të Kosovës vetëm nëse është mbështetur nga “Prodhuesit kosovarë prodhimi i të cilëve përbën baras ose më shumë se pesëdhjetë për qind të prodhimit total të produktit të ngjashëm”, ose “nëse kundërshtimi i shprehur për aplikimin e prodhuesve të Kosovës është më pak se prodhimi i këtyre prodhuesve që e mbështesin kërkesën”.
“Ministria e Industrisë, Ndërmarrësisë dhe Tregtisë respektivisht Departamenti i Tregtisë në konsultim me Komisionin për Vlerësimin e Masave Mbrojtëse në Importe, duke u bazuar në nenin 46 të Ligjit Nr. 047-240 Për Masat Antidamping dhe masat Kundërbalancuese, si dhe në bazë të analizës së të dhënave nga ky komision e cila u prezantua si analizë finale të datës 29.03.2023, rekomandon ndërprerjen e masës mbrojtëse anti-damping mbi sektorin e prodhimit të Koncentratit për shpezë dhe kafshë në bazë të të dhënave të lartcekura”, thuhet në këtë vendim.
Tetorin e vitit 2021, ministria në fjalë kishte vendosur masa mbrojtëse antidumping ndaj disa kompanive serbe, të cilat bëjnë importin e koncentratit për shpezë dhe kafshë, si dhe importin e bllokave.
Masa mbrojtëse e përkohshme antidumping prej 3 centë, ishte vendosur për këto kompani: FSH “Jabuka” doo Pancevo, “Gebi” doo, FSH “Sto Posto” dhe FSH “Becejka”.
Këto vendime thuhet se janë marrë pas kërkesës së prodhuesve vendorë.
“Pas kërkesës së prodhuesve vendor dhe propozimit të Komisionit për Vlerësimin e Detyrimeve të Veçanta në Importe, Departamenti i Tregtisë ka filluar hetimin e importit nga Serbia dhe të shitjes në tregun e Republikës së Kosovës të koncentratit për shpezë dhe kafshë. Hetimi është kryer në përputhje me Ligjin për masat antidumping dhe masat kundërbalancuese”, thuhej në arsyetimin e Ministrisë së Industrisë, Ndërmarrësisë dhe Tregtisë.
Ministrja Hajdari kishte deklaruar se kanë marrë dy vendime për masa mbrojtëse antidamping ndaj produkteve të caktuara të importuara nga Serbia.
Hajdari tregonte se vendimet kanë të bëjnë me importin e koncentratit të kafshëve dhe shpezëve, derisa tjetri për njësitë e bllokut ndërtimor.
“Sot më 8 tetor, kemi marrë dy vendime për masa mbrojtëse antidamping ndaj produkteve të caktuara të importuara nga Serbia. Njëri vendim cakton masën antidamping prej 3 centë për kilogramë në importin e koncentratit të kafshëve dhe shpezëve nga Serbia. Vendimi tjetër cakton masë antidamping prej 3 centë për njësitë e bllokut ndërtimor me origjinë nga Serbia”, thoshte Hajdari asokohe.
Sipas saj, dy vendimet janë marrë në përputhje me Ligjin për masat antidamping.
“Vendimeve u kanë paraprirë hetimet e ndara dhe analizat e mirëfillta të departamentit të tregtisë i cili ka vepruar sipas kërkesave të prodhuesit vendor. Fillimi i hetimeve është mbështetur veçanërisht në propozimin e komisionit për vlerësimin e detyrimeve të veçanta në importe. Hetimet kanë konfirmuar se produktet në fjalë shiten me çmim më të ulët në tregun e Republikës së Kosovë sesa më tregun e brendshëm të Serbisë si vend i origjinës”, deklaronte ministrja Hajdari tetorin e vitit 2021.
