Portieri i kombëtares së Kepit të Gjelbër, Vozinha, ka tërhequr interesimin e dy klubeve që duan ta transferojnë si lojtar të lirë, pasi u shndërrua në një nga historitë më të bukura të Kupës së Botës 2026.
Vozinha ishte një nga protagonistët kryesorë të rrugëtimit historik të Kepit të Gjelbër në turneun e parë të këtij vendi në Kupën e Botës, ku skuadra arriti deri në fazën e 1/16-ës së finales, përpara se të eliminohej me rezultat 3-2 pas vazhdimeve nga kampionia në fuqi, Argjentina.
Portieri mbajti portën e paprekur në ndeshjet ndaj Spanjës dhe Arabisë Saudite, ndërsa Kepi i Gjelbër e mbylli fazën e grupeve pa humbje dhe u kualifikua në fazën eliminatore si një nga ekipet më të mira të vendit të tretë.
40-vjeçari realizoi gjithsej 18 pritje në katër ndeshje dhe u bë një fenomen në rrjetet sociale, duke grumbulluar plot 25 milionë ndjekës në Instagram, teksa tifozët nga e gjithë bota u mahnitën nga historia e tij.
Pasi u bë një nga surprizat më të mëdha të këtij Botërori, duket se gjërat vetëm sa po përmirësohen për Vozinhan.
Ai aktualisht është pa klub, pasi kontrata e tij me skuadrën portugeze të kategorisë së dytë, Chaves, përfundoi.
Megjithatë, sipas Fabrizio Romanos, portieri ka marrë tashmë dy oferta nga klubet e Serie B në Brazil, të cilat janë të vendosura ta transferojnë. Përveç aspektit sportiv, lëvizja mund të sjellë edhe përfitime të mëdha marketingu.
Duke folur në një përditësim në rrjetin “X”, Romano deklaroi: “Çfarë e pret Vozinhan pas këtij Botërori fantastik? Mos harroni se ai është lojtar i lirë. Është 40 vjeç, por mund të jetë një mundësi si në fushë, ashtu edhe jashtë saj nga pikëpamja e marketingut. Vozinha tashmë ka dy oferta nga divizioni i dytë në Brazil. Klubet kanë nisur lëvizjet dhe ai së bashku me përfaqësuesit e tij do të zgjedhin mundësinë e duhur. Shumë shpejt do të gjejë klubin e ri”.
Ndërkohë, një raport tjetër pretendon se për Vozinhan ka interes edhe nga Inter Miami i David Beckhamit, klub që mund t’i ofrojë mundësinë e jashtëzakonshme për të ndarë dhomën e zhveshjes me fituesin tetë herë të “Topit të Artë”, Lionel Messi.
Sipas “Record”, klubi amerikan ka “interes të fortë” për portierin dhe e vlerëson shumë pas paraqitjeve të tij mbresëlënëse në Kupën e Botës.
Nëse transferimi realizohet, Vozinha me shumë gjasa do të ishte portieri rezervë, por do të ishte një hap gjigant në karrierën e tij, e cila ka ndryshuar rrënjësisht vetëm brenda pak javësh.
Pas fitores 3-2 të Argjentinës ndaj Kepit të Gjelbër, Lionel Messi tregoi klas duke e përgëzuar portierin për paraqitjet e tij dhe për rrugëtimin historik të kombëtares së tij.
Legjenda e Barcelonës pranoi gjithashtu t’ia dhuronte fanellën pas ndeshjes.
Vozinha tregoi: “Iu afrova Messit pas ndeshjes. Ai më përqafoi dhe më tha: ‘Je i madh. Populli yt duhet të jetë krenar për ty.’ Ishte diçka e pabesueshme për mua. Të dëgjosh fjalë të tilla nga dikush si Leo Messi do të thotë shumë. E falënderova dhe i thashë: ‘Faleminderit, Leo. Ti je më i miri.’ Pastaj e pyeta nëse mund t’i ndërronim fanellat. Leo më tha se do të ma jepte në tunel pasi të përfundonte intervistën”.
