Rreth 60 mijë emigrantë kanë hyrë në enklavën spanjolle të Ceutës nga Maroku brenda 24 orëve, ndërsa të paktën 43 persona kanë humbur jetën gjatë përpjekjes për të kaluar kufirin, sipas presidentit të Ceutës, Juan Jesús Vivas.
Përballë fluksit të paprecedentë, Spanja ka dislokuar forcat e armatosura për të përforcuar sigurinë në Ceuta dhe Melilla. Në kufi ka forca të larta ushtrie, teksa po ashtu nuk kanë munguar përplasjet e policisë së Marokut me emigrantët që tentojnë të largohen drejt territoreve spanjolle.
Kriza vjen pas një vendimi të Gjykatës Supreme të Spanjës, sipas të cilit emigrantët e ndaluar në det gjatë përpjekjes për të hyrë në Ceuta ose Melilla nuk mund të kthehen menjëherë në Marok. Kryeministri spanjoll Pedro Sánchez e cilësoi situatën si një “sulm” dhe deklaroi se të gjithë emigrantët që kanë hyrë ilegalisht do të kthehen në Marok “sa më shpejt të jetë e mundur”.
Sipas Ministrisë së Brendshme të Spanjës, numri i mbërritjeve është rreth 50 mijë, ndërsa mbi 25 mijë persona janë larguar vullnetarisht nga Ceuta për t’u kthyer në Marok. Autoritetet thanë se ritmi i largimeve ka arritur në rreth 150 persona në minutë.
Presidenti i Ceutës, Juan Jesús Vivas, e përshkroi situatën si “të paqëndrueshme”, duke theksuar se numri i emigrantëve të mbërritur përfaqëson rreth 70% të popullsisë së qytetit, e cila llogaritet në rreth 83.600 banorë. Ai u bëri thirrje autoriteteve qendrore për mbështetje shtesë për menaxhimin e krizës.
Qeveria spanjolle ka dërguar ushtrinë për të përforcuar kontrollin kufitar në Ceuta dhe në Melilla, ku gjatë natës u regjistruan gjithashtu 300 deri në 400 kalime të paligjshme.
Gjatë një vizite në Ceuta, Sánchez tha se qeveria po shqyrton masa për forcimin e mëtejshëm të kufirit me Marokun dhe akuzoi rrjetet kriminale se kanë manipuluar vendimin e Gjykatës Supreme, duke përhapur informacione të rreme që nxitën fluksin e emigrantëve.
Sánchez shtoi se autoritetet marokene po bashkëpunojnë me Spanjën për kthimin e personave që kanë hyrë ilegalisht në territor.
Sipas autoriteteve, një pjesë e madhe e emigrantëve janë të rinj, kryesisht burra, por në mesin e tyre ndodhen edhe gra, fëmijë dhe foshnje. Vlerësohet se të paktën 7 mijë nga personat që kanë hyrë në Ceuta gjatë 24 orëve të fundit janë të mitur.
