Bruno Fernandes ishte protagonisti kryesor i “Djajve të Kuq”, duke realizuar një “hat-trick” në kampionat për herë të parë që nga ndeshja hapëse e sezonit 2021/22.
Kjo fitore i dha fund edhe serisë prej tri ndeshjesh pa fitore ndaj skuadrave të sapograduara nën drejtimin e Michael Carrick.
Vendasit kërkonin reagim pas humbjes zhgënjyese në javën e parë, por tentativat e tyre për ta marrë kontrollin e ndeshjes u përballën me një Ipswich që dukej i bindur se mund të merrte diçka nga “Old Trafford”.
Pak para minutës së 15-të, të dy portierët u vunë në provë në një seri aksionesh të shpejta. Një goditje e Diogo Dalot nga distanca po shkonte drejt këndit të sipërm, por portieri gjigant i mysafirëve, Kjell Scherpen, e devijoi mbi traversë.
Nga goditja e këndit, Ipswich u nis menjëherë në kundërsulm. Julio Enciso tregoi shpejtësi të madhe duke lënë pas Luke Shaw dhe Bryan Mbeumo, por goditja e tij u ndal nga Senne Lammens.
Teksa tensioni po rritej në “Old Trafford”, skuadra e Gary O’Neil e shfrytëzoi momentin. Pas një tjetër pritjeje të Lammens ndaj Daizen Maedas, lojtari që i dha asistimin, Leif Davis, e zhbllokoi ndeshjen.
Davis realizoi në shtyllën e dytë pasi Abdul Fatawu kaloi me lehtësi Luke Shaw në krah dhe dërgoi një krosim në zonën e United.
Ipswich ishte pranë golit të dytë pak më vonë, por Lammens ndali edhe një goditje tjetër të Davis. Manchester United më pas përfitoi nga një moment vendimtar.
Marcelino Núñez rrëshqiti dhe i dhuroi vendasve një kundërsulm dy kundër një. Matheus Cunha asistoi Bruno Fernandes, i cili goditi fuqishëm në shtyllën e afërt dhe barazoi rezultatin.
Pas pushimit, skuadra e Carrick doli menjëherë në sulm në kërkim të përmbysjes dhe mund ta kishte realizuar shumë shpejt.
Bryan Mbeumo humbi në mënyrë të pabesueshme një rast nga vetëm rreth një metër largësi, duke goditur traversën pas krosimit të Marcus Rashford.
Nëse në atë rast United pati fat të keq, në aksionin e radhës fati ishte në anën e tyre.
Harry Maguire bllokoi një largim të topit në skaj të zonës së Ipswich, në një aksion ku dukej se e kishte prekur topin me dorë. Ai më pas gjuajti drejt portës, por goditja po shkonte jashtë derisa u devijua nga Jacob Greaves dhe përfundoi në rrjetë.
Protestat e Ipswich nuk ndryshuan asgjë, ndërsa United u hodh menjëherë në sulm.
Greaves pati një pasdite për t’u harruar, pasi shkaktoi penallti duke rrëzuar Matheus Cunhan brenda zonës.
Bruno Fernandes, i cili kishte humbur dy penallti gjatë fazës përgatitore, këtë herë nuk gaboi. Ai e dërgoi Scherpen në drejtim të gabuar dhe e çoi Unitedin në epërsi 3-1.
Portieri i Ipswich më pas ndali një goditje të Rashfordit, por nuk mundi ta shpëtonte skuadrën nga vala e sulmeve të vendasve.
Fernandes kompletoi hat-trickun e tij me një gol të lehtë, duke realizuar pas një aksioni ku goditjet e Kobbie Mainoos dhe Mbeumos u bllokuan.
Por kapiteni i United nuk u mjaftua me vetëm tri gola. Fernandes u shndërrua edhe në asistues, duke i dhënë topin Mbeumos, i cili e paraboloi Scherpenin.
Topi fillimisht u përplas në traversë dhe më pas kaloi vijën fatale, pavarësisht përpjekjes së Greaves për ta larguar.
Golat nuk përfunduan as në shiun e rrëmbyeshëm. Enciso i rrëmbeu topin Lisandro Martinezit dhe më pas asistoi Chuba Akpomin, i cili realizoi pas minutës së 90-të.
Megjithatë, fitorja e nëntë e Manchester United në 10 ndeshjet e fundit në Old Trafford që prej emërimit të Carrickut ishte siguruar shumë më herët.
“Djajtë e Kuq” më në fund regjistruan fitoren e parë në Premierligë këtë sezon, në një ndeshje ku Bruno Fernandes ishte heroi absolut.
