Bashkimi Evropian i ka bërë thirrje Shteteve të Bashkuara të tërheqin sanksionet e vendosura ndaj Gjykatës Ndërkombëtare Penale (GJNP), duke paralajmëruar se presioni ndaj këtij institucioni rrezikon pavarësinë dhe funksionimin e tij.
Në një deklaratë në emër të BE-së, Përfaqësuesja e Lartë për Politikën e Jashtme, Kaja Kallas, theksoi se Gjykata duhet të jetë në gjendje ta përmbushë mandatin e saj në mënyrë të pavarur, pa presione dhe ndërhyrje të jashtme.
Kallas bëri të ditur se Bashkimi Evropian është i gatshëm të ndërmarrë të gjitha masat e nevojshme për të garantuar vazhdimësinë dhe efektivitetin e punës së GJNP-së.
“Sulmet ose kërcënimet kundër Gjykatës, zyrtarëve të saj, stafit dhe personave që bashkëpunojnë me të, përfshirë përfaqësuesit e shoqërisë civile dhe ofruesit e shërbimeve, janë të papranueshme”, theksoi ajo.
Përfaqësuesja e Lartë e BE-së e vlerësoi vendimin e Uashingtonit për të shtyrë hyrjen në fuqi të masave, duke e cilësuar atë si një mundësi për dialog diplomatik dhe për arritjen e një zgjidhjeje.
Sipas Kallas, synimi duhet të jetë heqja sa më e shpejtë e sanksioneve, si dhe shmangia e masave të tjera që mund të cenojnë pavarësinë dhe integritetin e Gjykatës Ndërkombëtare Penale.
Ajo përshëndeti gjithashtu gatishmërinë e Shteteve të Bashkuara për të diskutuar shqetësimet e tyre me shtetet palë të Statutit të Romës, dokumentit themelues të GJNP-së.
Kallas ritheksoi se Bashkimi Evropian do të vazhdojë ta mbështesë Gjykatën, duke kontribuar në mbrojtjen e institucionit, stafit të tij dhe personave që bashkëpunojnë me të.
