Autoriteti britanik për mbrojtjen e të dhënave tha të mërkurën se një profesionist shëndetësor në spitalin privat ku Kate, Princesha e Uellsit, kishte bërë një operacion në vitin 2024, kishte tentuar të shiste “informacione personale shumë të ndjeshme”, të cilat besohet se ishin dosjet e saj mjekësore.
Zyra e Komisionerit të Informacionit (ICO) nisi një hetim në mars 2024 për të parë nëse stafi kishte tentuar të hynte në të dhënat mjekësore në “The London Clinic”, ku Kate, bashkëshortja e trashëgimtarit të fronit Princ William, kishte kryer një operacion abdominal dy muaj më parë.
Në një deklaratë të mërkurën, ICO tha se kishte përfunduar hetimin penal dhe kishte gjetur se një ish-punonjës shëndetësor kishte keqpërdorur qëllimisht informacione të ndjeshme, duke ofruar t’i zbulonte ato për përfitim financiar.
Sky News raportoi se rasti lidhej me Kate, ndërsa ICO refuzoi të komentonte se për kë bëhej fjalë konkretisht. Zyra e saj, “Kensington Palace”, gjithashtu refuzoi të komentonte.
Princesha e Uellsit, 44 vjeçe, kishte bërë operacion për një gjendje të pa specifikuar gjatë qëndrimit në spital. Disa muaj më vonë ajo njoftoi se do të ndiqte një trajtim me kimioterapi pasi testet zbuluan se një formë e pa specifikuar e kancerit kishte qenë e pranishme.
ICO tha se kishte lëshuar një paralajmërim zyrtar lidhur me shkeljen dhe nuk kishte gjetur mangësi të gjera në “The London Clinic”, një nga spitalet private më të mëdha në Britani që ka trajtuar edhe Mbretin Charles.
Kate tha vitin e kaluar se ishte në remision dhe është kthyer në detyrat publike, duke bërë vizitën e saj të parë zyrtare jashtë vendit pas trajtimit kur shkoi në Itali muajin e kaluar.
