Dy demokratët e lartë të Senatit kanë kërkuar një hetim mbi raportimet për kontaktet e multi miliarderit Elon Musk me Presidentin rus Vladimir Putin dhe ndihmësit e tij.
Ligjvënësit i kanë bërë thirrje Pentagonit dhe Departamentit të Drejtësisë të përcaktojnë nëse marrëdhëniet e dyshuara të Musk me një kundërshtar të ShBA-ve, ndërsa ka kontrata të mëdha me qeverinë, e rrezikojnë sigurinë kombëtare.
The Wall Street Journal raportoi muajin e kaluar se personi më i pasur në botë ka pasur “biseda të shumëfishta dhe të nivelit të lartë” me Putin që nga viti 2022, gjë që Kremlini e ka mohuar.
Musk shkroi në platformën e tij X të premten se ai “do të zbulojë kush po bën këto akuza dhe do t’i shkatërrojë”.
Dy demokratët – Senatori i Rhode Island Jack Reed, kryetar i Komitetit të Shërbimeve të Armatosura të Senatit, dhe Senatorja e New Hampshire Jeanne Shaheen, një demokrate e lartë në Komitetet e Shërbimeve të Armatosura dhe Marrëdhënieve me Jashtë, dërguan një letër të premten te Prokurori i Përgjithshëm Merrick Garland dhe Inspektori i Përgjithshëm i Departamentit të Mbrojtjes Robert Storch, duke ngritur “pyetje lidhur me besueshmërinë e Zotit Musk si kontraktor qeveritar dhe mbajtës i një niveli të lartë të sigurisë”.
