Përfaqësuesi i lartë ndërkombëtar për Bosnjë e Hercegovinën, Christian Schmidt, paralajmëroi se kërcënimet për shkëputje që vijnë nga Republika Srpska nuk duhet të konsiderohen thjesht retorikë, por një rrezik real për paqen dhe stabilitetin atje.
Schmidt dje mbajti një takim të jashtëzakonshëm me ambasadorët e shteteve anëtare të Komitetit Drejtues të Këshillit për Zbatimin e Paqes, organi që mbikëqyr zbatimin e Marrëveshjes së Dejtonit, pas së cilës zyra e tij në Sarajevë lëshoi një deklaratë për shtyp, duke thënë se në rend dite ishte situata aktuale në Bosnjë, raporton Intex.hr.
Përfaqësuesi i Lartë dhe Komandanti i Forcave Ushtarake të Bashkimit Europian në Bosnjë e Hercegovinë (EUFOR), gjenerali Laszlo Sticz, prezantoi vlerësimet e tij për situatën e sigurisë në vend, ndërsa Schmidt, siç u tha, i kushtoi vëmendje të veçantë njoftimeve për shkëputjen e RS që vjen nga udhëheqësit politikë të këtij entiteti.
“Njoftimet e tilla nganjëherë hidhen poshtë si thjesht retorikë politike. Unë nuk mendoj kështu: ne jemi dëshmitarë të zbatimit të një agjende politike që kërcënon integritetin territorial të Bosnjë-Hercegovinës”, tha Schmidt.
“Këto janë faktet: nuk ka të drejtë ligjore për t’u shkëputur dhe entitetet nuk janë shtete. Subjektet ekzistojnë vetëm sepse ekziston Bosnjë e Hercegovina. Kushdo që e vë në dyshim këtë është duke nxitur konflikt dhe komuniteti ndërkombëtar nuk do ta lejojë atë”, tha përfaqësuesi i lartë.
Ai paralajmëroi se komuniteti ndërkombëtar po monitoron nga afër nëse është ndërmarrë ndonjë aktivitet në Republika Srpska që mund të çojë në përçarje të rendit në BeH. Ai tha gjithashtu se bashkësia ndërkombëtare garanton ekzistencën e shtetit të Bosnjë-Hercegovinës, si dhe paqen dhe sigurinë e të gjithë qytetarëve.
Ai theksoi se askush nuk ka të drejtë ta rrezikojë këtë dhe se çdo përpjekje për ta destabilizuar atë do ta konsiderojë si kërcënim serioz për Marrëveshjen e Dejtonit.
