Anëtari i Kryesisë së LDK-së, Muhamet Hamiti, ka vlerësuar se Kosova po dëmtohet rëndë nga sanksionet e BE-së.
Ai ka bërë me dije se dëmet nga këto sanksione do të jenë afatgjate.
Në profilin e tij në “Facebook”, Hamiti ka shkruar se deri me tani qindra milionë euro është vlera e projekteve të bllokuara.
“Masat e BE-së”, më saktësisht sanksionet e BE-së, po i vuajnë qytetarët e Kosovës prej qershorit të vitit të kaluar, por jo Qeveria. Kur u vunë këto sanksione, Qeveria e Vetëvendosjes përpiqej ta minimizonte peshën e tyre, dëmin e tyre të pritshëm, duke thënë se janë të përkohshme. Masa të përkohshme i quante edhe BE-ja. Dëmet janë afatgjata: qindra milionë euro është vlera e projekteve të bllokuara deri tani. Sanksionet mbesin në fuqi. S’dihet kur do të hiqen. Duket se nuk do të hiqen gjatë qeverisjes aktuale të VV-së. Prandaj, Kosova po i vuan pasojat e Qeverisë së Vetëvendosjes”, ka shkruar ai.
Më tej, Hamiti ka përmendur dështimet në politikë të jashtme.
“Kosova nuk e ka siguruar asnjë njohje në katër vitet e fundit. Kur kemi ende 5 vende të BE-së që nuk e njohin Kosovën, statusi i vendit kandidat për anëtarësim në BE nuk duket në horizont, për fat të keq”, ka shkruar ai.
