Në ambientet e FC Drenica është zhvilluar një takim ndërmjet drejtuesve të klubit dhe presidentit të Federatës së Futbollit të Kosovës, Agim Ademi, i shoqëruar nga bashkëpunëtorët e tij.
Gjatë vizitës, drejtuesit e klubit e njoftuan kreun e FFK-së me ecurinë e FC Drenicës dhe përgatitjet për sezonin e ri garues. Në fokus të diskutimeve ishte edhe projekti për vendosjen e reflektorëve në stadiumin e klubit, i cili financohet nga Federata e Futbollit e Kosovës, ndërsa punimet, sipas palëve, po zhvillohen sipas planit.
Me këtë rast, Agim Ademi rikonfirmoi përkushtimin e Federatës për përmirësimin e infrastrukturës sportive dhe krijimin e kushteve sa më të mira për zhvillimin e futbollit në Kosovë.
Nga ana tjetër, FC Drenica shprehu mirënjohjen për mbështetjen e vazhdueshme të FFK-së, duke vlerësuar kontributin e saj në avancimin e futbollit, jo vetëm në Skenderaj, por edhe në mbarë vendin.
