Kryenegociatori serb, Petar Petkoviq ka pretenduar se delegacioni i Kosovës refuzoi të marrë pjesë në takimin trepalësh gjatë ditës së sotme në Bruksel.
Sipas “Kossev”, ai citohet të ketë thënë:
“Ai refuzoi t’i takojë përfaqësuesit e Beogradit, sepse ne insistuam në tema si Asociacioni, shërbimet postare dhe çështjen e implementimit të Marrëveshjes së Ohrit”.
Petkoviq ka pretenduar se sot do ta ketë një takim me përfaqësues të NATO-s në Bruksel, me të cilët, sipas tij “do të flasin për urën”.
“Ne do të flasim për çështjen e urës, por nga prizmi i sigurisë, ekzistojnë të gjitha rreziqet nëse Kurti fillon ta hapë urën në mënyrë të njëanshme. Kjo është e pamundur sepse NATO është e pranishme në atë urë dhe prandaj është e rëndësishme të bisedohet me ta”.
“Në pjesën ligjore kërkojmë respektimin e marrëveshjes, insistojmë te demarkacioni në zonën e Suhodoll si parakusht për hapjen e urës.” – ka thënë ai.
