Binjakët më të famshëm të Francës kanë ndërruar jetë në moshën 72-vjeçare, si pasojë e Covid-19.
Në 15 Dhjetor, Igor dhe Grichka Bogdanoff u shtruan në një spital të Parisit, ku qëndruan për 2 javë, derisa në datën 28 Dhjetor, Grichka ndërroi jetë. Igor rezistoi deri në datën 3 Janar, por pa i mbijetuar dot më tej koronavirusit.
72-vjeçarët nuk kanë qenë të vaksinuar kundër koronavirusit. Miqtë e tyre kanë treguar se ata kanë besuar se mënyra e jetës që kanë bërë do të mjaftonte që ata të ishin të mbrojtur nga virusi.
Binjakët Bogdanoff ishin shumë popullorë mes elitës franceze dhe ishin miq të shumë personaliteteve të shquara. Ata u bënë të famshëm në vitet ’70, me programin e parë televiziv që i kushtohej shkencës, ndërkohë që bota i njohu më shumë për pamjen e jashtme të tyre, të modifikuar jashtëzakonisht shumë me operacione plastike.
