Kylian Mbappe ka zbuluar një zakon të fshehtë në futboll, të cilin e ka të vështirë ta ndryshojë, pavarësisht se e përshkruan si “vërtet të keq”.
Mbappe shënoi dy gola në fitoren 4-1 të Real Madridit ndaj Sevillas gjatë fundjavës, duke e çuar numrin e golave të tij këtë sezon në 11 në të gjitha garat.
Francezi do të synojë ta vazhdojë formën e shkëlqyer të shënimit të golave të mërkurën, kur Los Blancos e presin RB Leipzigun në Ligën e Kampionëve.
Por, para përballjes në “Santiago Bernabeu”, Mbappe ka zbuluar një traditë që vazhdon ta ndjekë, ndonëse nuk është diçka që ua rekomandon futbollistëve të rinj që synojnë të bëhen profesionistë.
Në një intervistë për “Onze Mondial”, Mbappe zbuloi se luan pa shtrojat e brendshme në këpucët e futbollit, edhe pse e di se kjo “nuk është gjë e mirë për t’u bërë”.
Mbappe luan pa shtroja që kur ishte fëmijë dhe po binte në sy te Bondy, në moshën gjashtëvjeçare. Ai e cilësoi këtë si një “refleks të vjetër”.
Mbappe tha: “Një sekret për mua? Ka një milion sekrete për Kylianin! E gjithë ideja e një sekreti është që të mos e zbulosh, apo jo?
“Një sekret futbolli… Kam një zakon vërtet të keq. Nuk është gjë e mirë për t’u bërë, por unë prapëseprapë e bëj: luaj pa shtroja të brendshme në këpucë.
“Prandaj, të gjithë fëmijëve atje dua t’u them: mos i hiqni shtrojat nga këpucët! Mbajini brenda! Unë bëra gabimin t’i hiqja kur isha fëmijë dhe që atëherë kam luajtur gjithmonë pa shtroja.
“Edhe pse tani i kam këpucët më të mira dhe nuk ka absolutisht asnjë arsye që të mos përdor shtroja, është thjesht ai refleksi i vjetër nga koha ime në Bondy: ende i heq, madje edhe nga këpucët e prodhuara posaçërisht për mua!”
Mbappe nënshkroi kontratë me “Nike” kur ishte vetëm tetë vjeç dhe vazhdoi t’i qëndronte besnik markës me logon e famshme deri në ngritjen e tij si njëri prej futbollistëve më të mirë në botë.
Ai u bë një nga figurat kryesore të produkteve të futbollit të “Nike” dhe pati edhe këpucët e veta me firmë, në linjën “Mercurial”.
Megjithatë, pas gati 20 vitesh bashkëpunimi me “Nike”, kontrata e Mbappes përfundoi dhe ai u bë lojtar i lirë në tregun e sponsorizimeve.
Ylli i dikurshëm i Paris Saint-Germainit e bëri shpejt të ditur lëvizjen e tij të radhës, duke nënshkruar një marrëveshje që mund të ndryshojë shumë gjëra me markën zvicerane “On”.
Pas hyrjes së suksesshme në tregun e vrapimit dhe sporteve të tjera, futbolli është synimi i radhës madhor i kësaj marke, e cila siguroi shërbimet e Mbappes për një marrëveshje të raportuar dhjetëvjeçare.
Thierry Henry është angazhuar si “drejtor i futbollit” i markës, ndërsa Mbappe do të shërbejë edhe si ambasador global. Përveç një marrëveshjeje fitimprurëse sponsorizimi, ai do të ketë gjithashtu edhe një pjesëmarrje financiare në kompaninë “On”.
Këpucët e para pritet të dalin në treg në vitin 2027, por Mbappe tashmë po i përdor ato në fushë. Ai i debutoi këto këpucë në fitoren e Francës ndaj Turqisë, ku shënoi golin e fitores.
Në këtë fazë, ato janë ende vetëm prototipe, ndërsa Mbappe ka rol qendror në testimin e teknologjisë krejtësisht të re “LightSpray”, në zhvillimin e së cilës ka ndihmuar edhe vetë.
