Deputeti i zgjedhur i LDK-së, Ekrem Hyseni, ka thënë se LDK-ja do t’i përgjigjet pozitivisht ftesës së Glauk Konjufcës për takim me partitë politike për konsulta përgatitore për seancën konstituive të 15 prillit.
“Absolutisht po, kjo ftesë e kryeparlamentarit nuk është ftesë e subjektit të LVV-së por është ftesë institucionale të cilën e rregullon rregullorja e funskionimit të Kuvendit ku thotë se kryeparlamentare fton partitë në takim konsultativ për të caktuar rendin e ditës dhe njëkohësisht rendin e ditës dhe ulëset e deputetëve dhe çështjet e tjera që funksionojnë në mbarëvajtjen e e seancës së parë. LDK-ja do të marrë pjesë në takim me kryeparlamentarin Konjufca sepse konstituimi i legjislacionit të ardhshëm bëhet përmes rregullores dhe ligjeve në fuqi”, tha Hyseni për rtv21.
Deputeti Hyseni tha po ashtu se do të jenë pjesë e seancës së 15 prillit, por nuk do ta përkrahin kandidatin e LVV-së për kryeparlamentar.
“Ne do të jemi pjesë e seancës së 15 prillit, por normalisht asnjë kandidat të LVV-së nuk do ta përkrahim, por as të ndonjë partie tjetër pa një marrëveshje paraprake politike”, tha ai.
Edhe deputeti i aleancës për Ardhmërinë e Kosovës, Bekë Berisha ka thënë se do t’i përgjigjen ftesës së Kryetarit të Kuvendit Glauk Konjufca për takimin me 8 prill për të diskutuar për seancën konstituive.
“Sigurisht e kemi obligim që partitë politike , sigurisht që do të marrë pjesë edhe Aleanca”, tha ai.
Po ashtu ai u shpreh se do ta mbështesin edhe propozimin e Vetëvendosjes për Kryetar të Kuvendit.
“Janë rregulla kush do që të jetë kandidat, edhe do të jemi prezentë në seancë sepse e kemi obligim ndaj qytetarëve”, u shpreh Berisha.
