La Liga dhe kompania sportive Puma kanë prezantuar zyrtarisht topin e ri që do të përdoret në sezonin 2026/2027 të kampionatit spanjoll, i quajtur “Stellar Nitro Ultimate”, të cilin e kanë cilësuar si modelin më inovativ të zhvilluar ndonjëherë.
Sipas njoftimit të përbashkët, ky top është dizajnuar për t’iu përgjigjur zhvillimit të vazhdueshëm të futbollit modern dhe kërkesave gjithnjë në rritje të sportit elitar.
Qëllimi i tij nuk është vetëm përshtatja me ritmin e lojës bashkëkohore, por edhe përmirësimi i performancës në çdo aspekt të saj.
Dizajni i “Stellar Nitro Ultimate” kombinon performancën me një identitet të veçantë estetik, duke sjellë një pamje moderne dhe të sofistikuar.
Topi ka një bazë të bardhë, të plotësuar me detaje në nuanca të fuksias, bruzit dhe vjollcës, ndërsa elementet në të zezë krijojnë kontrast dhe thellësi vizuale, duke e bërë më të dallueshëm gjatë lëvizjes në fushë.
Një nga risitë kryesore teknologjike të këtij modeli është “Nitrofoam”, një shkumë inovative e mbushur me azot që ndodhet në bërthamën e topit.
Kjo teknologji rrit kthimin e energjisë pas goditjes, duke i dhënë topit më shumë shpejtësi kur largohet nga këmba e lojtarit.
Po ashtu, topi është ndërtuar me strukturë 4+4 panelesh, të cilat ndihmojnë në balancimin e rrjedhës së ajrit dhe reduktimin e rezistencës gjatë fluturimit.
Sipërfaqja e jashtme është gjithashtu më e ashpër dhe me teksturë të veçantë, duke ndihmuar topin të depërtojë më mirë në ajër dhe të ruajë shpejtësinë përgjatë gjithë trajektores së tij.
