Julian Alvarez mbetet në dyshim për derbin e Madridit, pasi sulmuesi i Atletico Madridit vazhdon rikuperimin nga një dëmtim muskulor që e ka mbajtur jashtë dy ndeshjeve të fundit.
Argjentinasi mungoi ndaj Real Sociedad dhe Osasunas për shkak të një tërheqjeje muskulore të pësuar të shtunën e kaluar, ndërsa tani po punon intensivisht për t’u rikthyer në kohë për përballjen me Real Madridin në “Metropolitano”.
Sipas “Mundo Deportivo”, Alvarez ende nuk është bashkuar me pjesën tjetër të skuadrës në stërvitje dhe do të ketë vetëm dy seanca, të premten dhe të shtunën, për të dëshmuar se është gati për derbin.
Mbetet për t’u parë nëse do të jetë në gjendje ta nisë ndeshjen nga minuta e parë apo do të përdoret nga stoli.
Alemany: Gjithçka varet nga gjendja e muskulit
Drejtori sportiv i Atletico Madridit, Mateu Alemany, foli për gjendjen e sulmuesit para ndeshjes me Osasunan.
“Nëse do të luajë apo jo, do të varet shumë nga gjendja e kuadricepsit të tij dhe nga mënyra se si do të ndihet, sepse të gjithë e dimë se çfarë do të thotë një dëmtim muskulor”, deklaroi Alemany për “Movistar”.
Ai shtoi se Alvarez po bën gjithçka për të qenë i gatshëm.
“Alvarez po stërvitet, po përgatitet dhe po i kushton shumë kohë rikuperimit për këtë ndeshje. E njoh dhe e di se ka dëshirë të veçantë për të luajtur. Do të bëjë gjithçka që është në dorën e tij për të qenë i pranishëm.”
Atletico shpreson ta ketë titullar
Alvarez është dilema më e madhe e Atletico Madridit para derbit.
Nëse rikuperohet plotësisht, ai mund ta nisë ndeshjen si titullar, duke marrë parasysh rëndësinë e tij në skuadër dhe faktin se vetëm një javë më parë ishte në formacionin bazë ndaj Liverpoolit në “Anfield”.
Në rast se Alvarez nuk është gati, Diego Simeone ka edhe alternativa të tjera në sulm.
Jonathan David në formë të mirë
Jonathan David mund të jetë zgjedhja kryesore për ta zëvendësuar Alvarezin ose për të luajtur përkrah tij.
Sulmuesi kanadez ka shënuar në secilën prej dy ndeshjeve të fundit, ndaj Real Sociedad dhe Osasunas, ndërsa në këtë të fundit regjistroi edhe një asistim.
Forma e mirë e David i jep stafit teknik më shumë fleksibilitet përpara një prej ndeshjeve më të rëndësishme të sezonit.
Sorloth vazhdon të mungojë
Alexander Sorloth nuk pritet të jetë i gatshëm për derbin.
Sulmuesi norvegjez pësoi një dëmtim muskulor rreth një muaj e gjysmë më parë dhe ka munguar në të shtatë ndeshjet zyrtare të Atletico Madridit deri tani.
Nëse nuk rikuperohet, derbi ndaj Real Madridit do të jetë ndeshja e tetë radhazi që ai e humb.
Edhe Barrios në dyshim
Një tjetër problem për Atletico Madridin është Pablo Barrios.
Mesfushori pritet ta humbasë përballjen me Real Madridin për shkak të një dëmtimi të lehtë miofascial në këmbën e djathtë.
Për momentin, vëmendja kryesore mbetet te gjendja e Julian Alvarez, me Atletico Madridin që shpreson ta ketë sulmuesin e tij kryesor në dispozicion për derbin e madh të kryeqytetit spanjoll. /
