Gati gjysma e demokratëve nuk pajtohen se si presidenti Joe Biden ka menaxhuar konfliktin mes Izraelit dhe Hamasit.
Në sondazhin e “Associated Press” shihet ndarja e thellë brenda partisë së demokratëve në lidhje me luftën. Në sondazh 50 për qind e demokratëve kanë miratuar mënyrën se si Bideni ka menaxhuar konfliktin, teksa 46 për qind e pjesëmarrësve nuk janë pajtuar.
Dy grupet ndryshojnë ndjeshëm në pikëpamjet e tyre për mbështetjen e SHBA-së për Izraelin. Sulmi i Hamasit në të cilin mbetën të vrarë 1 mijë e 400 persona në Izrael, shtet që është kundërpërgjigjur me pushtimin e Gazës, ka krijuar situatë të vështirë politike për Bidenin.
Presidenti amerikan ka përkrahur sovranitetin e Izraelit, por i ka bërë presion që të kufizojë numrin e civilëve të vrarë dhe të lejojë ndihmat humanitare në Gazë.
Lufta do t’ia vështirësojë përpjekjet Bidenit për mandatin e dytë si president pasi brenda partisë ka qëndrime të ndryshme në lidhje me konfliktin dhe se kush është përgjegjës.
Opinionet për qasjen e Bidenit nuk kanë pasur ndikim në përkrahjen e demokratëve për themelimin e shtetit të pavarur palestinez.
Bideni, ashtu si paraardhësit e tij republikanë dhe demokratë, ka përkrahur zgjidhjen me dy shtete, ani pse asnjë administratë amerikane nuk ka punuar shumë në këtë drejtim.
