Kandidati për kryeministër nga Aleanca për Ardhmërinë e Kosovës, Ardian Gjini, ka vizituar një fabrikë në Mitrovicë, të cilën e ka vlerësuar si shembull të suksesshëm të punës dhe sipërmarrjes vendore.
Gjatë vizitës, Gjini tha se pronarët e fabrikës përfaqësojnë një histori suksesi, e ndërtuar përmes punës dhe përkushtimit ndër vite.
Ai theksoi rëndësinë e mbështetjes së bizneseve që sipas tij, kontribuojnë në zhvillimin ekonomik të vendit dhe krijimin e vendeve të punës.
Gjini shtoi se Kosova duhet të ndërtojë një mjedis ku qytetarët kanë mundësi të nisin bizneset e tyre dhe të arrijnë rezultate përmes punës së ndershme.
Ai falënderoi familjen Misini për mikpritjen, duke e cilësuar përvojën e tyre si motivuese dhe përfaqësuese të Kosovës që, sipas tij, duhet të promovohet.
