Sulmuesi Angel di Maria mendon se Lionel Messi është më i miri i të gjitha kohërave, ndërsa nuk e ka befasuar deklarata e Cristiano Ronaldos.
Di Maria është ndër lojtarët e paktë që ka luajtur me Messin dhe Ronaldon, kurse beson se epiteti i më të mirit (GOAT) shkon për bashkëkombësin e tij.
Sipas tij, 8 herë Topi i Artë si dhe Kupa e Botës mjaftojnë për ta dëshmuar se Messi është ‘i zgjedhuri’.
“Deklarata e Ronaldos? Nuk më befason. Kam luajtur me të te Real Madridi për katër vite. Gjithnjë ka qenë kështu, duke u përpjekur të jetë më i miri. Fatkeqësisht për të, ka lindur në gjeneratën e gabuar sepse është dikush tjetër i zgjedhur”.
“Realiteti final janë numrat, njëri ka fituar tetë herë Topin e Artë, e tjetri pesë, është dallim i madh. Pastaj është Messi që e ka fituar Kupën e Botës, që e bën ndryshimin dhe dy Kupa të Amerikës gjithashtu”.
“Për mua nuk ka dyshime, Lionel Messi është lojtari më i mirë në historinë e futbollit”, deklaroi ai ndër të tjera.
Të njëjtin mendim e ka pasur edhe Javier Mascherano, i cili gjithashtu ka dhënë mbështetje për Messin.
