Bashkimi Europian u ka bërë të qartë linjave ajrore se duhet të vazhdojnë të kompensojnë pasagjerët për anulimet e fluturimeve të lidhura me rritjen e kostove të karburantit, edhe pse industria po përballet me krizën më të madhe të furnizimit me karburant të avionëve në vite.
Sipas Financial Times, komisioneri europian për Transportin ka paralajmëruar kompanitë ajrore se rritja e çmimeve të energjisë apo kostot e larta të karburantit nuk konsiderohen automatikisht “rrethana të jashtëzakonshme” që i përjashtojnë nga detyrimi për kompensim ndaj udhëtarëve.
Debati është intensifikuar pasi lufta në Lindjen e Mesme dhe tensionet rreth Ngushticës së Hormuzit kanë tronditur tregun global të karburanteve të avionëve. Europa konsiderohet veçanërisht e ekspozuar, pasi importon një pjesë të madhe të karburantit të avionëve nga Lindja e Mesme.Shoqata Ndërkombëtare e Transportit Ajror (IATA) ka paralajmëruar se Europa mund të përballet me anulime fluturimesh gjatë verës për shkak të mungesës së karburantit. Drejtori i përgjithshëm i IATA-s, Willie Walsh, tha se fluturimet mund të fillojnë të anulohen nga fundi i majit nëse furnizimet mbeten të kufizuara.Ndërkohë, linjat ajrore europiane po përpiqen të përballojnë kostot në rritje.
Lufthansa ka njoftuar se pret një goditje prej rreth 1.7 miliardë eurosh nga rritja e çmimeve të karburantit gjatë vitit 2026, ndërsa ITA Airways ka paralajmëruar rritje të çmimeve të biletave me 5%-10%.Disa kompani kanë nisur tashmë të reduktojnë fluturimet ose të vendosin tarifa shtesë karburanti. KLM njoftoi anulimin e 160 fluturimeve europiane në muajin e ardhshëm për shkak të kostove të larta të karburantit, edhe pse kompania deklaroi se nuk po përballet me mungesë fizike furnizimi.Sipas rregullores europiane EC261, pasagjerët në BE mund të përfitojnë kompensim nga 250 deri në 600 euro për anulime ose vonesa të gjata fluturimesh, përveç rasteve kur kompanitë provojnë se shkaku lidhet me rrethana të jashtëzakonshme jashtë kontrollit të tyre.
