Barcelona po e monitoron situatën rreth kontratës së Harry Kane te Bayern Munichu, teksa klubi katalunas po përgatit planet për transferimin e një sulmuesi të nivelit botëror.
Sipas talkSPORT, objektivi kryesor i Barcelonës është Julián Álvarez i Atletico Madridit, por në listën e klubit janë edhe Harry Kane dhe Erling Haaland.
Barcelona po e sheh Álvarezin si opsionin e preferuar për repartin ofensiv, por në rast se një marrëveshje me Atletico Madridin rezulton e pamundur, atëherë vëmendja mund të zhvendoset te Kane ose Haaland.
Në veçanti, klubi katalunas po ndjek nga afër bisedimet mes Kane dhe Bayern Munichut për të ardhmen e tij. Situata kontraktuale e sulmuesit anglez mund të ndikojë në planet e Barcelonës për afatin kalimtar të ardhshëm.
Kane, 33-vjeçar, vazhdon të jetë një prej sulmuesve më të njohur në futbollin evropian, ndërsa Barcelona tashmë po shqyrton disa alternativa për të përforcuar vijën e parë.
Megjithatë, për momentin bëhet fjalë për monitorim dhe planifikim, pa ndonjë marrëveshje të arritur me asnjërin prej lojtarëve.
