Deputeti i Lëvizjes Vetëvendosje, Mefail Bajqinovci i është përgjigjur kritikave të disa deputetëve të partive opozitare, të cilët kanë kritikuar paraqitjen e zëvendëskryeministrit të parë dhe ministrit të Jashtëm në seancën e Këshillit të Sigurimit në OKB.
Bajqinovci ka thënë se paraqitja e Konjufcës ishte e mirë dhe përmbajtjesore edhe për rastin e ish-krerëve të UÇK-së.
Ai ka thënë se opozita kurrë nuk është e kënaqur dhe e kanë kundër në çfarëdo forme.
“Gjithmonë opozitën e kemi kundër pa marrë parasysh në çfarëdo aspekti që t’i e mbron UÇK-së. Mendoj që Konjufca në mënyrën më të mirë të mundshme e ka mbrojte luftën e çlirimtare të Kosovës dhe argumentet e ndryshme ku i ka ballafaquar me Gjuriqin. Glauku e ka treguar veten edhe gjatë gjykimit në Hagë, interesimin tij për këtë çështje. Z.Konjufca në mënyrën më të mirë të mundshme e ka përfaqësuar Kosovë në OKB”, ka thënë ai në emisionin “Këndi i Debatit” në Tëvë1.
Bajqinovci ka thënë se Konjufca e ka treguar interesimin e tij për këtë çështje edhe gjatë gjykimit në Hagë ku edhe ka qenë atje kur është shpall aktgjykimi.
Deputetja e PDK-së, Ariana Musliu – Shoshi, vlerëson se Konjufca u tregua i rezervuar në mbrojtjen e ish-krerëve.
“Mënyra se si është trajtuar aktgjykimi ndaj krerëve dhe vet historisë së Kosovës ka qenë e papranueshme nga ministri Konjufca. 81 vjet burg, nuk mund të kalohen me dy fjali diplomatike, është dashur që të përmenden me emra ashtu siç ka pasur edhe mundësinë në KS të OKB-së, është një platformë ku e dëgjon e tërë bota” , tha ajo.
Kritika për paraqitjen e Konjufcës pati edhe nga Aleanca.
Daut Haradinaj nga kjo parti, tha se në Këshillin e Sigurimit nuk u prezantua mjaftueshëm e vërteta për luftën e Kosovës dhe sakrifica për liri.
“Një Kosovë e poshtëruar deri në këtë pikë kurrë s’e kam prit. Bota po na sheh çuditshëm, sikur na kemi vra e pre popuj, pa e thënë të vërtetën për luftën dhe gjakderdhjen tonë për liri. Marre, Glauk! Kurrë s’kemi me u ndalë deri te e vërteta jonë, o të pafytyrë!”, u shpreh Haradinaj.
Në OKB, Konjufca foli për krimet e kryera nga Serbia në Kosovë, sulimin e Banjskës dhe fkatin se Radoiç është ende i lire.
Sa i përket vendimit të Dhomave të Specializuara të cilat shpallën fajtorë katër ish-krerët e Ushtrisë Çlirimtare të Kosovës, Konjufca deklaroi se pavarësisht që u theksua që UÇK-ja nuk është në gjykim dhe nuk është qëllimi që të humben vlerat e luftës çlirimtare, shteti i Kosovës do të punojë që në shkallën e Apelit të korrigjohet padrejtësia.
“Aty u theksua qartë që lufta e Ushtrisë Çlirimtare të Kosovës nuk është në gjykim dhe vendimi nuk ka për qëllim të humb vlerën e luftës çlirimtare e pastaj edhe shpalljen e shtetit të pavarur si elementi më i rëndësishëm i stabilitetit të rajonit. Pavarësisht kësaj kemi shqetësime serioze për sa i përket dënimeve të ashpra. Ne mendojmë se ato përmbajnë gabime në kuptimin e përmbajtjes dhe fakteve dhe presim që në Apel t’i korrigjojmë këto”, ka deklaruar Konjufca.
