Agjencia Kundër Korrupsionit është deklaruar për rastin e deputetit të Lëvizjes Vetëvendosje, Mirsad Shkretës, i cili pretendon se i janë vjedhur 50 mijë euro në banesën e tij.
Drejtori i AKK-së, Ylli Buleshkaj për Klankosova.tv ka thënë se raporti i dorëzuar nga deputeti, e mbulon periudhën për vitin e kaluar, derisa raportimi për pasurinë, të hyrat do të bëhet në vitin 2023.
Buleshkaj theksoi se nëse rasti vërtetohet që të hollat janë mbajtur kesh, dhe nuk janë raportuar mund të konsiderohet shkelje.
“Raporti i dorëzuar përmes formularit të pasurisë nga deputeti, e mbulon periudhën kohore 1 janar-31 dhjetor 2021”, është shprehur Buleshkaj për Klankosova.tv.
“Raportimi për pasurinë, të hyrat, etj bëhet në vitin 2023. Në rast që mund të vërtetohet që të hollat janë mbajtur kesh nga viti i kaluar, dhe nuk janë raportuar mund të konsiderohet shkelje”, shtoi ai.
Në raportin e deklarimit të pasurisë në AKK, të cilin e ka dorëzuar këtë vit, Shkreta, nuk figurojnë paratë që i ka denoncuar në polici si të vjedhura.
Sipas AKK-së, deputeti i VV-së ka deklaruar se posedon dy llogari bankare, me gjithsej 101 mijë e 689 euro.
