Carlo Ancelotti i ka dalë në mbrojtje Vinicius Juniorit, duke theksuar se kritikat e fundit ndaj yllit të Real Madridit nuk e ndryshojnë faktin se ai mbetet një nga futbollistët më të mirë në botë.
Trajneri italian i kombëtares së Brazilit foli në një intervistë ekskluzive për Times of India, gjatë turneut miqësor të “Seleçaos” në Australi, Indi dhe Singapor.
I pyetur për rënien e formës së Viniciusit dhe kritikat që braziliani ka marrë në Madrid, Ancelotti pranoi se sulmuesi nuk po kalon momentin e tij më të mirë.
“Për momentin mund të mos jetë në formën e tij më të mirë, por cilësia e Viniciusit nuk diskutohet. Për shembull, ai pati paraqitje shumë të mirë në Kupën e Botës. Asnjë futbollist nuk mund të jetë gjatë gjithë kohës në kulmin e formës”, deklaroi Ancelotti.
Trajneri italian vazhdoi duke shprehur besimin e plotë që ka te ish-lojtari i tij në Real Madrid.
“Ai është një futbollist i jashtëzakonshëm, ndër më të mirët në botë. Jam i bindur se në ndeshjet e ardhshme do ta shohim sërish në nivelin e tij më të mirë. Kam besim të plotë tek ai”, shtoi Ancelotti.
Ancelotti zbulon planin afatgjatë me Brazilin
Ancelotti foli gjithashtu për projektin që po ndërton me kombëtaren braziliane, duke theksuar se ndeshjet miqësore kanë rëndësi të madhe për identifikimin dhe testimin e futbollistëve të rinj.
“Këto ndeshje janë jashtëzakonisht të dobishme, sepse na japin mundësinë të shohim lojtarë të ndryshëm. Synimi im është të vëzhgoj futbollistë që nuk i njoh aq mirë dhe kjo do të më ndihmojë në përzgjedhjen e skuadrës për turnetë zyrtarë”, tha ai.
Sipas Ancelottit, Brazili po punon për të krijuar një tranzicion të kujdesshëm mes brezit aktual dhe gjeneratës së ardhshme.
“Po punojmë për ndërtimin e një brezi të ri lojtarësh. Kemi një bazë të fortë dhe tani po përqendrohemi në përgatitjet për Copa America 2028 dhe Kupën e Botës 2030”, shpjegoi trajneri italian.
Brazili monitoron deri në 70 futbollistë çdo javë
Ancelotti zbuloi gjithashtu se stafi i tij teknik ndjek nga afër një numër shumë të madh lojtarësh brazilianë që aktivizohen në kampionate të ndryshme.
“Çdo javë monitorojmë mes 60 dhe 70 lojtarë që mund të grumbullohen me kombëtaren. Kërkojmë kudo: në Evropë, Rusi dhe Arabinë Saudite. Futbollistët brazilianë janë kudo dhe detyra jonë është të mos lëmë asnjë talent pa e ndjekur”, përfundoi Ancelotti.
