Kryeprokurori i Prokurorisë Speciale, Blerim Isufaj, ka refuzuar të komentojë akuzat e lëshuara sot nga Zyra e Kurtit.
Zyra e Kryeministrit, në një përgjigje drejtuar Gjykatës Themelore në Prishtinë lidhur me kërkesën e Prokurorisë Speciale për ta intervistuar kryeministrin Albin Kurti në cilësinë e dëshmitarit lidhur me skandalin e Rezërvës Shtetërore, ka drejtuar akuza ndaj Prokurorisë, teksa është marrë specifikisht me Kryeprokurorin Blerim Isufaj. ZKM e ka cilësuar si politike ftesën nga Prokuroria, teksa ka thënë se po tenton të krijojë një përceptim të rrejshëm kundër kryeministrit Kurti.
“Një gjë e tillë është motivuar edhe nga qëndrimi publik i Kryeministrit kundër propozimit për emërim të z. Blerim Isufaj si kryeprokuror i shtetit. Rrjedhimisht, nuk mund të mos shohim çdo veprim të Prokurorisë Speciale si politikisht të motivuar e publikisht të paarsyetuar”, thuhet në përgjigje.
Gazeta Online Reporteri.net e ka pyetur Kryeprokurorin Isufaj për këto akuza, mirëpo i njëjti s’ka komentojë.
“Nuk komentoj fare”, është përgjigjur shkurt Isufaj.
ZKM ka kërkuar nga Gjykata që të obligojë Prokurorinë Speciale të marrë dëshminë e kërkuar, brenda Zyrës së Kryeministrit, duke thënë se duhet të merret parasysh “agjenda e tij është e ngjeshur”.
Aty thuhet se Kurti ka qenë dhe mbetet i gatshëm të japë dëshminë e tij.
“…intervistimi nga Prokuroria mund të bëhej që në muajin dhjetor të vitit 2024, kur është bërë ftesa. Megjithatë, Prokuroria ka zgjedhur që, në vend të efikasitetit të humb kohë në dëm të përfundimit të procedurës së hetimit, të prolongojë çdo veprim e të mbetet pa përfundime të rëndësishme për publikun, vetëm për të arritur projeksionet politike, të dëmshme e të pafalshme për një sistem të pavarur të drejtësisë. Duke marrë parasysh sa më sipër, Zyra e Kryeministrit thekson edhe njëherë që Kryeministri ka qenë dhe mbetet i gatshëm të japë dëshminë e tij. Kërkesa e tij që kjo të ndodhë në ambientet e Zyrës së Kryeministrit është plotësisht e arsyeshme dhe nuk mund të interpretohet si shmangie nga drejtësia. Në dritë të kësaj, me respekt kërkojmë nga Gjykata që të obligojë Prokurorinë Speciale të marrë dëshminë e kërkuar, brenda Zyrës së Kryeministrit”, thuhet në përgjigje.
