Ish-kandidati për deputet nga radhët e AAK-së, Haki Abazi, ka thënë se nuk duhet abstrahuar idenë që ndonjë deputet nga Vetëvendosja mund të lëvizë.
Abazi tha se me siguri që po punohet në të gjitha drejtimet dhe sipas tij, VV-ja sot ka probleme të brendshme, pasi tha se janë favorizuar në garën për deputetë njerëzit që nuk kanë zë politik.
“Edhe sot kanë probleme të brendshme. Nuk zgjidhet Adnan Rrustemi, që ka qenë ndër deputetët më aktivë të VV-së, e zgjidhet Edona Llalloshi. A e kuptoni sa është e përplasshme situata përbrenda, pra janë favorizuar njerëzit që nuk kanë zë politik brenda”.
“Nga lista që njoh unë aty, ka shumë njerëz të pakënaqur, ani pse e kanë fituar mandatin e deputetit. Gjëja më e lehtë është që të ketë lëvizje të deputetëve të Vetëvendosjes sepse ata janë njerëz që nuk kanë lidhje me asnjë gjë që ka të bëjë me përcaktimin politik të Kurtit”, tha Abazi në “DPT te Fidani” në Klan Kosova.
Ai u shpreh se tre deri në katër deputetë “lirshëm” mund të lëvizin nga partia e Kurtit, edhe në qoftë se ky i fundit e formon i vetëm qeverinë.
“Nuk mund të them që ka proces të negocimit, por nuk është i pamundur skenari që njerëzit nga VV-ja lëvizin, duke e pasur parasysh katërvjeçarin”.
“Tre-katër deputetë lirshëm mund të lëvizin. Jam i bindur se edhe po ta krijonte një qeveri Kurti vet, prapë rreziku i lëvizjes së tyre është permanent, pasi struktura e VV-së është tek një njeri i vetëm”, tha Abazi.
