Zyrtarja policore Esra Çololar, e angazhuar në Stacionin Policor në Mitrovicën e Veriut, është vetëplagosur aksidentalisht më 1 maj 2025, në shtëpinë e saj në Prizren, ndërsa ishte jashtë detyrës zyrtare.
Incidenti ndodhi në dhomën e gjumit të saj, teksa Çololar ishte duke manipuluar me armën e saj zyrtare të shërbimit, një pistoletë Glock, e cila u shkrep aksidentalisht, duke e plagosur atë në këmbë. Në momentin e ngjarjes, në dhomë ndodhej edhe nëna e saj.
Zyrtares i është ofruar ndihma e parë mjekësore dhe gjendja e saj shëndetësore është stabile, jashtë rrezikut për jetë.
Lidhur me rastin, Prokuroria Themelore në Prizren ka autorizuar nisjen e një procedure penale për veprën “Shkaktim i rrezikut të përgjithshëm”, pasi përdorimi i pakujdesshëm i armës ka vënë në rrezik jetën e saj dhe të personave tjerë të pranishëm, raporton Sinjali.
