Shpërthimi i vullkanit Anak Krakatau ka lënë mbi 150 mijë pasagjerë të bllokuar në Indonezi, pasi autoritetet pezulluan përkohësisht operimet në gjashtë aeroporte.
Aeroporti Ndërkombëtar Soekarno-Hatta në Xhakartë ishte i pari që u mbyll të dielën në mëngjes, pasi hiri vullkanik u zbulua në hapësirën ajrore pranë aeroportit. Ministri i Transportit, Dudy Purwagandhi, tha se deri tani janë prekur 467 fluturime dhe u kërkoi kompanive ajrore të shqyrtojnë devijimin e disa linjave drejt aeroporteve të tjera.
Sipas BBC, aktiviteti i vullkanit nisi të premten vonë, me lëkundje të vazhdueshme sizmike, fontana lave dhe shpërthime të fuqishme, ndërsa dy shpërthime të tjera u regjistruan herët të dielën.
Pezullimi ka prekur veçanërisht fluturimet drejt dhe nga Singapori, si dhe linja ndërkombëtare për Doha, Sidnei dhe Kuala Lumpur.
Agjencia meteorologjike BMKG raportoi se hiri arriti deri në 6,000 metra mbi Java dhe 15,000 metra në anën e Sumatrës. Autoritetet thanë se nuk ka paralajmërim për cunami.
Ministria e Shëndetësisë u bëri thirrje banorëve në zonat e prekura të qëndrojnë brenda dhe të përdorin maska për t’u mbrojtur nga hiri.
