Kupa e Botës 2026 theu disa rekorde, përfshirë edhe atë të fondit të shpërblimeve financiare të ndara nga FIFA.
Spanja, kampionia e re e botës, do të përfitojë një shumë rekord prej 51 milionë dollarësh, pasi mposhti Argjentinën me dhjetë lojtarë në finalen e së dielës.
Goli i Ferran Torresit në minutën e 106-të i siguroi “La Rojas” titullin e dytë botëror, pas fitores së vështirë 1-0 ndaj skuadrës së Lionel Scalonit.
Finalja e zhvilluar në Nju Xhersi nuk prodhoi shumë raste për shënim, pasi të dyja skuadrat hasën vështirësi në fazën sulmuese. Situata ndryshoi pasi Enzo Fernandez mori kartonin e dytë të verdhë në minutat shtesë të kohës së rregullt, pas një ndërhyrjeje ndaj Pau Cubarsit.
Pas përjashtimit të mesfushorit argjentinas, skuadra e Luis de la Fuentes mori kontrollin e ndeshjes dhe arriti ta siguronte triumfin gjatë vazhdimeve.
Sa do të përfitojë secili futbollist i Spanjës?
Vetëm për arritjen në finale, secilit prej 26 futbollistëve të Spanjës i ishte garantuar një shpërblim prej më shumë se 550 mijë dollarësh para tatimeve, sipas një raportimi të gazetës spanjolle “AS”.
Pas fitimit të trofeut, kjo shumë u rrit ndjeshëm. Futbollistët pritet të ndajnë mes tyre 45 për qind të shpërblimit prej 51 milionë dollarësh që Spanja do të marrë nga FIFA.
Sipas përllogaritjes së drejtpërdrejtë të kësaj përqindjeje, secili lojtar do të përfitonte rreth 883 mijë dollarë para tatimeve. Raportimet spanjolle, megjithatë, e kanë vlerësuar shpërblimin individual në rreth 940 mijë dollarë, varësisht nga mënyra e ndarjes dhe bonuset shtesë.
Argjentina, ndërkohë, do të përfitojë 34 milionë dollarë si nënkampione e botës. Ende nuk është konfirmuar se sa nga kjo shumë do t’u ndahet 26 futbollistëve të saj.
Shpërblimet sipas renditjes në Botërorin 2026
FIFA i shpërblen kombëtaret në bazë të fazës deri ku kanë arritur në turne.
Kampionia:
Spanja – 51 milionë dollarë
Nënkampionia:
Argjentina – 34 milionë dollarë
Vendi i tretë:
Anglia – 30 milionë dollarë
Vendi i katërt:
Franca – 28 milionë dollarë
Vendet 5–8: nga 20 milionë dollarë
Zvicra, Norvegjia, Belgjika dhe Maroku.
Vendet 9–16: nga 16 milionë dollarë
Kolumbia, Egjipti, Shtetet e Bashkuara, Portugalia, Meksika, Brazili, Paraguai dhe Kanadaja.
Vendet 17–32: nga 12 milionë dollarë
Gana, Algjeria, Australia, Kepi i Gjelbër, Austria, Kroacia, Bosnjë-Hercegovina, Senegali, Republika Demokratike e Kongos, Ekuadori, Suedia, Bregu i Fildishtë, Holanda, Gjermania, Japonia dhe Afrika e Jugut.
Vendet 33–48: nga 10 milionë dollarë
Uruguai, Skocia, Koreja e Jugut, Irani, Uzbekistani, Iraku, Arabia Saudite, Curaçao, Republika Çeke, Katari, Panamaja, Jordania, Tunizia, Zelanda e Re, Haiti dhe Turqia.
Fond rekord prej 871 milionë dollarësh
Shpërblimet e ndara sipas ecurisë së kombëtareve në turne arrijnë në total 703 milionë dollarë.
Fondi i përgjithshëm i FIFA-s për Botërorin 2026 ishte 871 milionë dollarë. Pjesa e mbetur prej 168 milionë dollarësh u nda mes kombëtareve pjesëmarrëse, pavarësisht rezultateve të tyre në fushë.
