Reperi i njohur kanadez, Drake, ka humbur një tjetër bast të madh sportiv, pasi kishte vendosur 1.28 milionë euro në fitoren e Argjentinës ndaj Spanjës në finalen e Kupës së Botës 2026.
Artisti, emri i vërtetë i të cilit është Aubrey Drake Graham, publikoi në llogarinë e tij në Instagram një fotografi të bastit të vendosur në platformën “Stake”, pak përpara finales së zhvilluar më 19 korrik në Nju Jork.
Në rast se Argjentina do të fitonte trofeun, Drake do të arkëtonte më shumë se 4.36 milionë euro.
Krahas fotografisë së bastit, reperi shkroi me humor: “Cila ishte ajo shprehja? Më shumë fat herën tjetër…”, duke shprehur besimin se Lionel Messi dhe bashkëlojtarët e tij do të triumfonin ndaj Spanjës.
Megjithatë, parashikimi i tij rezultoi i gabuar. Spanja e fitoi finalen me rezultat 1-0, duke bërë që reperi kanadez ta humbiste shumën e vendosur.
Drake njihet për bastet e tij me vlera të mëdha në ngjarje sportive, por parashikimet e tij shpesh kanë përfunduar pa sukses.
Pak kohë më parë, ai humbi edhe rreth 850 mijë euro, pasi kishte parashikuar fitoren e Conor McGregorit në duelin e UFC-së ndaj Max Holloway.
Prej vitesh, tifozët kanë krijuar shprehjen “Mallkimi i Drake”, një teori sipas së cilës skuadrat apo sportistët që mbështeten publikisht nga reperi kanadez përfundojnë shpesh të mposhtur.
Pas humbjes së Argjentinës në finalen e Botërorit, kjo teori është rikthyer sërish në vëmendjen e tifozëve në rrjetet sociale.
