Shtetet e Bashkuara kanë njoftuar një rritje të shitjeve të mallrave ushtarake për Indinë, duke filluar nga viti 2025, me planin për të ofruar edhe avionët luftarakë F-35. Presidenti amerikan, Donald Trump, theksoi se do të rriten shitjet ushtarake në Indi me miliarda dollarë dhe se po hapet rruga për t’i siguruar atyre avionët F-35. Megjithatë, ai nuk dha një afat kohor për realizimin e këtyre shitjeve, duke theksuar se këto lloj marrëveshjesh për teknologji të avancuar zakonisht kërkojnë vite për t’u përmbyllur.
Në një konferencë të përbashkët për shtyp pas një takimi me kryeministrin indian Narendra Modi, Trump gjithashtu njoftoi se dy vendet kishin arritur një marrëveshje që përfshin rritjen e importeve të naftës dhe gazit nga SHBA në Indi, për të zvogëluar deficitin tregtar mes dy shteteve. Gjithashtu, Trump theksoi bashkëpunimin në luftën kundër terrorizmit radikal islamik.
India ka bërë marrëveshje për të blerë mbi 20 miliardë dollarë produkte të mbrojtjes amerikane që nga viti 2008, përfshirë një marrëveshje të fundit për blerjen e 31 dronëve MQ-9B SeaGuardian dhe SkyGuardian. Sipas Shërbimit Kërkimor të Kongresit amerikan, India pritet të shpenzojë mbi 200 miliardë dollarë për modernizimin e ushtrisë gjatë dekadës së ardhshme.
Për më tepër, Rusia ka qenë furnizuesja kryesore e armëve për Indinë, por për shkak të luftës në Ukrainë, aftësia e Moskës për të eksportuar ka rënë. Kjo ka detyruar Indinë të kthejë sytë nga perëndimi, duke përfshirë edhe blerjen e avionëve F-35. Megjithatë, Rusia ka ofruar të prodhojë avionin e saj luftarak Sukhoi Su-57 në Indi, duke u munduar të mbajë lidhje të forta me Nju Delhin.
