Lionel Scaloni do të vazhdojë të jetë përzgjedhës i Kombëtares së Argjentinës deri pas përfundimit të Kampionatit Botëror 2030.
Lajmi është bërë i ditur nga presidenti i Federatës së Futbollit të Argjentinës, Claudio Tapia, në një konferencë për media, ku është konfirmuar vazhdimi i bashkëpunimit me trajnerin 48-vjeçar.
Scaloni, i cili e udhëhoqi Argjentinën drejt triumfit në Kupën e Botës 2022 në Katar, ka deklaruar se entuziazmi i tij për të vazhduar këtë projekt është i njëjtë si në ditën e parë.
“Një projekt i ri fillon tani”, ka thënë ai.
Trajneri argjentinas ishte përballur me pikëpyetje rreth të ardhmes së tij pas humbjes 1:0 ndaj Spanjës në finalen e Botërorit të këtij viti, të zhvilluar më 19 korrik në New Jersey.
Scaloni mori drejtimin e Argjentinës në shtator të vitit 2018, pa pasur përvojë të mëparshme si trajner në një nivel të tillë, por arriti të ndërtojë një skuadër historike.
Nën drejtimin e tij, Argjentina fitoi Kupën e Botës në vitin 2022, si dhe dy tituj të Copa América, në vitet 2021 dhe 2024.
Tashmë, sfida e tij e radhës do të jetë ndërtimi i një kapitulli të ri për kampionët e botës, pas largimit të Lionel Messit nga futbolli ndërkombëtar.
Me këtë marrëveshje, Scaloni synon të vazhdojë projektin e tij deri në Botërorin e vitit 2030, ku Argjentina do të synojë të mbetet ndër kombëtaret kryesore të futbollit botëror.
