Cristiano Ronaldo ka vendosur t’i japë fund karrierës së tij me Përfaqësuesen e Portugalisë, duke mbyllur kështu një kapitull historik prej më shumë se dy dekadash me fanellën e vendit të tij.
Ylli portugez e përfundon aventurën ndërkombëtare me rekorde të jashtëzakonshme: 234 paraqitje dhe 146 gola, duke u bërë golashënuesi më i mirë në historinë e futbollit ndërkombëtar për kombëtare.
Ronaldo debutoi me Portugalinë në vitin 2003 dhe gjatë kësaj periudhe përjetoi momente të paharrueshme, ndërsa Flashscore ka përzgjedhur pesë ndeshjet më të veçanta të tij me fanellën e “Seleçaos”.
1. Suedi – Portugali (2013)
Një prej paraqitjeve më të mëdha individuale të Ronaldos erdhi në ndeshjen e kthimit të plejofit për Botërorin 2014. Pas fitores 1:0 në ndeshjen e parë, Ronaldo realizoi het-trik në Stokholm, duke mposhtur edhe Zlatan Ibrahimovicin, i cili shënoi dy gola për Suedinë. Portugalia fitoi 3:2 dhe siguroi kualifikimin në Botëror.
2. Portugali – Francë (2016)
Edhe pse nuk arriti ta përfundonte ndeshjen, kjo ishte një prej netëve më emocionuese në karrierën e tij. Ronaldo u lëndua në minutën e 25-të të finales së Euro 2016 dhe u largua nga fusha mes lotësh. Megjithatë, ai vazhdoi ta mbështeste ekipin nga vija anësore, ndërsa Portugalia fitoi 1:0 pas vazhdimeve, falë golit të Ederit, duke u shpallur kampione e Evropës për herë të parë.
3. Portugali – Spanjë (2018)
Në Botërorin e vitit 2018 në Rusi, Ronaldo dhuroi një prej paraqitjeve më spektakolare të karrierës së tij ndërkombëtare. Ai realizoi tre gola ndaj Spanjës në një ndeshje që përfundoi 3:3. Goli i tretë, nga një goditje dënimi në minutat e fundit, mbetet një prej momenteve më ikonike të tij në fanellën e Portugalisë.
4. Portugali – Spanjë (2025)
Në gjysmëfinalen e Ligës së Kombeve, Ronaldo shënoi golin vendimtar në fitoren ndaj Gjermanisë, ndërsa në finale kundër Spanjës realizoi golin e barazimit. Portugalia triumfoi pas ekzekutimit të penalltive, duke fituar trofeun për herë të dytë në histori.
5. Portugali – Kroaci (2026)
Në atë që përshkruhet si paraqitja e tij e fundit në një Kampionat Botëror, Ronaldo ishte përsëri protagonist. Ai realizoi nga pika e bardhë ndaj Kroacisë, duke ndihmuar Portugalinë të fitonte 2:1 dhe të siguronte kalimin në fazën e 1/8 së finales.
Kështu mbyllet një prej kapitujve më të mëdhenj në historinë e futbollit ndërkombëtar, me Cristiano Ronaldon që largohet nga Portugalia si rekordmen absolut për gola dhe paraqitje.
