Real Madridi po e përgatit një përmirësim të madh financiar për Jude Bellinghamin, duke synuar ta shpërblejë mesfushorin anglez për rëndësinë që ka në projektin e klubit.
Sipas raportimeve të mediave spanjolle, drejtuesit madrilenë janë të gatshëm t’ia rrisin ndjeshëm pagën, duke e afruar me nivelin e yjeve më të paguar të skuadrës.
Bellingham aktualisht përfiton rreth 20.8 milionë euro bruto në sezon, ndërsa me kushtet e reja paga e tij mund të arrijë afërsisht 30 milionë euro në vit.
Kjo do ta vendoste në të njëjtën kategori financiare me Kylian Mbappen dhe Vinicius Juniorin, duke reflektuar statusin e tij te gjiganti spanjoll.
Anglezi tashmë ka arritur marrëveshje për vazhdimin e kontratës deri në vitin 2031, në vend të afatit të mëparshëm që përfundonte më 2029.
Megjithatë, përmirësimi i kushteve financiare është një tjetër hap që Reali dëshiron ta konkretizojë për ta siguruar të ardhmen e tij afatgjatë në Santiago Bernabeu.
Bellingham, i cili iu bashkua Realit në vitin 2023 nga Borussia Dortmundi, vazhdon të jetë një prej futbollistëve më të rëndësishëm të skuadrës.
Këtë sezon, nën drejtimin e Jose Mourinhos, ai po aktivizohet më afër sulmit, ndërsa deri tani ka regjistruar pesë gola dhe katër asistime.






