José Mourinho do të ribashkohet me ish-bashkëpunëtorin e tij Cristian Chivu në vendin e triumfit të tyre më të madh, kur Real Madridi dhe Interi të përballen në një ndeshje spektakolare hapëse të Ligës së Kampionëve.
Ishte pikërisht në “Bernabéu”, ku Chivu ishte pjesë e Interit të drejtuar nga Mourinho, që zikaltrit mposhtën Bayern Munich 2-0 në finalen e Championsit në vitin 2010.
Ish-mbrojtësi i majtë luajti 68 minutat e para, ndërsa dopieta e Diego Militos i ndihmoi zikaltrit të kompletonin tripletën, pas triumfeve në Scudetto dhe Coppa Italia.
Mourinho u largua më pas për të nisur aventurën e tij të parë si trajner i Real Madridit.
Liga e Kampionëve ishte i vetmi trofe madhor që i mungoi gjatë kohës së tij në Madrid, pavarësisht se i udhëhoqi “Los Blancos” drejt tri gjysmëfinaleve radhazi.
Ai drejtoi Real Madridin në 36 ndeshje në kompeticion dhe fitoi 24 prej tyre (66.7%).
Vetëm Carlo Ancelotti (68.8%) ka një përqindje më të mirë fitoresh me klubin, mes trajnerëve që kanë drejtuar të paktën 10 ndeshje në Champions.
Real Madridi gjithashtu shënoi në 97% të atyre ndeshjeve (35), përqindja më e lartë nga çdo skuadër që ka luajtur të paktën 20 ndeshje nën drejtimin e një trajneri të caktuar.
Megjithatë, Madridi nuk arriti të shënonte të premten, pasi pësoi humbjen e parë që nga rikthimi i Mourinhos, duke u mposhtur 1-0 nga Real Betis.
Troy Parrott shënoi golin e fitores në minutën e 81-të në “Estadio La Cartuja de Sevilla”, ndërsa Kylian Mbappé humbi një penallti në fund të ndeshjes.
Mbappé do të kërkojë të rikthehet te golat në Champions, kompeticion në të cilin ishte golashënuesi më i mirë sezonin e kaluar me 15 gola. Kjo e çoi numrin e tij të përgjithshëm në kompeticion në 70 gola në 98 ndeshje.
Ai ka numrin më të madh, së bashku me shokun e skuadrës Vinícius Júnior, të përfshirjeve direkte në gola gjatë pesë sezoneve të fundit, me 52 të tilla (43 gola dhe 9 asistime), ndërsa Vinícius ka 30 gola dhe 22 asistime.
Një tjetër gol në këtë ndeshje do ta ngjiste kapitenin e Francës në kuotën e 71 golave, në nivel me ish-sulmuesin e Real Madridit, Raúl, dhe do ta bënte atë golashënuesin e pestë më të mirë në historinë e Kupës së Evropës/Ligës së Kampionëve, së bashku me Raúlin.
Në anën tjetër të fushës, Thibaut Courtois pritet të zhvillojë ndeshjen e tij të 100-të në Champions. Nëse e nis ndeshjen si titullar, portieri do të bëhet lojtari i 56-të që arrin shifrën treshe të paraqitjeve në këtë kompeticion.
Gjithashtu në repartin mbrojtës të Madridit, Denzel Dumfries mund të përballet për herë të parë me Interin që nga largimi i tij nga klubi gjatë verës.
Dumfries ndihmoi Interin të arrinte në dy finale të Championsit, në vitet 2023 dhe 2025, megjithëse sezonin e kaluar nuk mundi të ndihmonte skuadrën, e cila u eliminua në fazën “play-off” të eliminimit direkt.
Interi e nisi sezonin me katër fitore radhazi, por tri humbje në katër ndeshje bënë që skuadra të humbte kualifikimin automatik për në fazën e 1/8-ave.
Kjo rezultoi vendimtare për ekipin e Chivus, i cili më pas u eliminua në dy ndeshje nga surpriza Bodø/Glimt.
Megjithatë, ka edhe arsye për optimizëm. Interi ka fituar katër nga pesë ndeshjet e fundit si mysafir në fazën e ligës (1 humbje), duke mbajtur portën e paprekur në secilën prej këtyre fitoreve. Në fakt, 17 ndeshjet e fundit të tyre në total në fazën e grupeve/fazën e ligës kanë sjellë 12 ndeshje pa pësuar gol.
Interi gjithashtu nuk ka arritur të shënojë vetëm në dy nga 19 ndeshjet e fundit në Champions dhe vjen në ndeshjen hapëse të këtij sezoni pas një fillimi perfekt të mbrojtjes së titullit në Serie A, me tri fitore në tri ndeshje.
Ky rekord i përsosur ishte në rrezik të shtunën, kur Interi ishte duke humbur 2-0 ndaj Napolit pas 53 minutash në “San Siro”. Megjithatë, një dopietë e Lautaro Martínez, mes të cilave u shënua edhe një gol me kokë nga Marcus Thuram, kompletoi përmbysjen e jashtëzakonshme, duke bërë që Interi të rikuperonte një disavantazh prej dy golash dhe të mposhte Napolin në Serie A për herë të parë.
Goli i Martínezit në kohën shtesë do të thotë se ai tani ka shënuar 133 gola për Interin në elitën e futbollit italian. Kjo e ngjit atë në vendin e tretë, së bashku me Stefano Nyers, në listën e golashënuesve më të mirë të të gjitha kohërave të klubit, pas vetëm Giuseppe Meazzas (197) dhe Benito Lorenzit (138).
Real Madridi ka fituar gjashtë nga shtatë përballjet e fundit me Interin (1 humbje), përfshirë të katër përballjet në Champions në këtë shekull. Interi është përballur me Real Madridin më shumë se me çdo kundërshtar tjetër në kompeticionet madhore evropiane që nga viti 2000, pa arritur të regjistrojë një fitore.
Interi nuk ka shënuar në tri prej këtyre përballjeve. Vetëm ndaj Barcelonës, nga viti 2003 deri në 2009, ata kanë pasur katër ndeshje radhazi në Kupën e Evropës/Champions pa gjetur rrugën drejt rrjetës.
Duhet të kthehemi te fitorja 5-1 ndaj Valencias në sezonin 2004-05 për të gjetur herën e fundit kur kampionët në fuqi të Serie A mposhtën një kundërshtar spanjoll si mysafir. Që atëherë, ata nuk kanë fituar në 13 ndeshje të tilla (4 barazime, 9 humbje).
Në të kundërt, Real Madridi ka fituar 19 nga 21 ndeshjet e fundit kundër klubeve italiane (2 humbje). Ata gjithashtu kanë fituar shtatë përballjet e fundit në shtëpi me Interin, duke mbajtur portën e paprekur në katër prej tyre.
Superkompjuteri i “Opta” favorizon fitoren e vendasve, duke i dhënë Real Madridit 56.0% mundësi për të fituar.
Mundësitë e Interit për fitore vlerësohen në 22.3%, ndërsa mundësia që ndeshja të përfundojë në barazim është 21.7%.
Real Madridi ka fituar ndeshjen e parë të sezonit në 17 nga 19 edicionet e fundit të Championsit (2 humbje). Ata gjithashtu kanë fituar 14 nga 16 ndeshjet e fundit në fazën e grupeve/fazën e ligës (2 humbje).
Ndërkohë, Interi humbi pesë nga gjashtë ndeshjet e fundit sezonin e kaluar në këtë kompeticion (1 fitore). Kjo është e njëjta sasi humbjesh që kishin pësuar në 39 ndeshjet e tyre të mëparshme në Champions (25 fitore, 9 barazime)
FORMACIONET E MUNDSHME:
Real Madrid: Thibaut Courtois, Trent Alexander-Arnold, Antonio Rüdiger, Dean Huijsen, Marc Cucurella, Jude Bellingham, Federico Valverde, Yan Diomande, Brahim Díaz, Vinícius Júnior, Kylian Mbappé
Trajner: José Mourinho
Inter: Josep Martínez, Benjamin Pavard, Manuel Akanji, Alessandro Bastoni, Luis Henrique, Nicolò Barella, Hakan Çalhanoğlu, Petar Sučić, Carlos Augusto, Lautaro Martínez, Marcus Thuram
Trajner: Cristian Chivu
