Kryetari i Prishtinës, Përparim Rama, ka reaguar lidhur me propozimin për ndërtimin e Operës, duke kritikuar mungesën e koordinimit me Kryeqytetin dhe duke kërkuar bashkëpunim ndërmjet institucioneve.
Përmes një postimi, Rama ka ngritur çështjen e trashëgimisë kulturore, duke pyetur nëse ajo po merret parasysh edhe në rastin e projektit “Ishulli Urban”, të cilin, sipas tij, po e bllokojnë në emër të trashëgimisë.
Ai ka theksuar se projekti “Ishulli Urban” lidh rreth 30 mijë banorë me qendrën e qytetit.
Rama ka kritikuar gjithashtu gjendjen e institucioneve kulturore, duke përmendur Teatrin Kombëtar dhe Muzeun Kombëtar, të cilët, sipas tij, janë të mbyllur tash e pesë vjet.
Sa i përket propozimit për Operën, ai ka thënë se është bërë pa bashkëpunim, koordinim dhe planifikim të përbashkët me Kryeqytetin.
Në fund, Rama ka ftuar institucionet që të bashkëpunojnë për realizimin e këtij projekti, duke shprehur gatishmërinë e Komunës për të ndarë hapësirën, angazhuar ekspertë dhe ndihmuar në koordinim.
Ai ka thënë se qëllimi duhet të jetë që qytetarët të përfitojnë dhe artistët ta kenë shtëpinë që meritojnë.
