Shumë pak diferencë në renditje.
Kështu ka treguar sondazhi i fundit kombëtar i realizuar në SHBA – me më pak se dy muaj para ditës së zgjedhjeve – për dy kandidatët presidencialë, Kamala Harris dhe ish-presidenti, Donald Trump.
Sondazhi, nga “The New York Times” dhe “Siena College”, tregon Trumpin me 48 për qind dhe Harris me 47 për qind në mesin e votuesve të mundshëm.
Rezultatet janë të ngjashme me një sondazh të korrikut, menjëherë pasi presidenti Joe Biden hoqi dorë nga oferta e tij për rizgjedhje.
Sondazhi vjen përpara debatit të Harris dhe Trump në “ABC News” të martën mbrëma, i vetmi debat i planifikuar deri më tani midis dy kandidatëve.
Dhe ky debat mund të jetë edhe më vendimtar për zëvendëspresidenten.
Sipas sondazhit, 28 për qind e votuesve të mundshëm thanë se ndjejnë se duhet të mësojnë më shumë për Harris, krahasuar me 9 për qind që thanë se duhet të dinë më shumë për Trump.
Siç vë në dukje Times, kjo është hera e parë që Trump ka pasur të paktën një epërsi nominale në një “sondazh të madh kombëtar jopartiak” rreth muajit të fundit.
Sondazhi u krye me 1 mijë e 695 votues të regjistruar midis 3 dhe 6 shtatorit.
Marzhi i gabimit të sondazhit është +/- 2,8 pikë përqindje midis votuesve të mundshëm.
