Sot në Bruksel është mbajtur takimi i radhës në mes të kryeministrit të Kosovës, Albin Kurti dhe presidentit serb Aleksandar Vuçiq, nën ndërmjetësimin e Josep Borrell dhe vartësit të tij, Miroslav Lajçak, ku nga ky takim nuk u arrit asgjë.
Pas takimi Borrell është shprehur se Kurti ka refuzuar një propozim dhe njëjtë është shprehur edhe Vuçiq, ndërsa Kurti ka thënë se në takim nuk u prezantua asnjë plan përpos një propozimi.
Ndonëse Vuçiqi e kishte prezantuar sot një plan, ai, sipas Kurtit, është i vjetër.
Së fundmi është publikuar propozimin e Vuçiqit për normalizim të raporteve me Kosovën, ku sipas mediumit në bazë të nenit 2, duket të jetë i vjetër së paku 6 muaj, siç theksoi edhe Kurti:
Opsioni A1 – Së pari Asociacioni i Komunave me Shumicë Serbe (tutje, ASK) e më pas diskutime tjera
Plani për zbatimin e normalizimit të marrëdhënieve mes Serbisë dhe Kosovës
- Palët pajtohen që procesi i zbatimit të normalizimit të raporteve mes Serbisë dhe Kosovës duhet përshpejtuar përmes hapave të paraqitur në këtë Plan, në atë formë dhe përbrenda kohëzgjatjes së paraparë nga Nenet në vijim.
- Palët pajtohen se deri në fund të marsit 2023, Ekipi Menaxhues në Dialogun e Lehtësuar nga BE-ja (siç janë pajtuar palët në kontekst të zbatimit të Marrëveshjes së Parë të Parimeve për Rregullimin e Raporteve dhe të caktuar nga Qeveria e Kosovës) do të prezantojë Draft-Statutin e parë të Asociacionit të Komunave me Shumicë Serbe në Kosovë, i cili do të ofrojë nivel të duhur të vetëmenaxhimit për komunitetin serb në Kosovë, pas së cilit Palët menjëherë do t’i nisin negocitatat për Statutin, me lehtësimin e BE-së.
- Palët pajtohen se brenda 90 ditëve nga prezantimi i Draft-Statutit të Parë të Asociacionit të Komunave me Shumicë Serbe në Kosovë do të finalizojnë negociatat në dokumentin respektiv. Pas kësaj, Kosova do të adoptojë Rregulloren dhe të gjitha dokumentet e nevojshme të cilat do të mundësojnë qëndrueshmërinë ligjore të Statutit, në atë formë siç është paraparë nga Marrëveshjet të cilave u referohet Neni 4 në këtë Plan.
- Deri në fund të tetorit 2023, themelimi i Asociacionit të Komunave me Shumicë Serbe në Kosovë do të përfundojë, në pajtim me të gjitha dispozitat e Marrëveshjeve në vijim që janë arritur përbrenda Dialogut në lidhje me çështjen respektive:
- Marrëveshja e Parë e Parimeve për Rregullimin e Normalizimt të Marrëdhënieve (2013),
- Plani i Zbatimit të Marrëveshjes së Parë (2013)
- Fushëveprimtaria dhe Mandati i Ekipit Menaxhues për Zbatimin e Asociacionit të Komunave Serbe (2013) dhe
- Asociacioni/Komuniteti i komunave me shumicë serbe në Kosovë – parimet e përgjithshme/elementet kryesore (2015).
- Pas themelimit formal të Asociacionit të Komunave me Shumicë Serbe, Palët menjëherë do të përkushtohen në diskutime për zbatimin e propozimit të BE-së për normalizim të raporteve mes Serbisë dhe Kosovës.
