Protestuesit që janë mbledhur sonte në Prishtinë në kuadër të protestës “Jo në emrin tim”, kanë nisur marshimin drejt Ministrisë së Drejtësisë.
Një nga organizatorët e protestës, Çlirim Haziri, u bëri thirrje sërish Kuvendit dhe Qeverisë, që ta votojnë ndryshimet në Ligjin për Gjykatën Speciale.
‘’Edhe sonte në këtë shesh, deri sa Kosovës e UÇK-së t’i kthehet dinjiteti. Votojeni ligjin përse nuk kemi kohë të presim, Kosova nuk do të jetë e qetë pa e mbrojtur UÇK-në, lavdi dëshmorëve e UÇK-së”, ka thënë Haziri.
Marshimi po zhvillohet si pjesë e protestës kundër vendimit të Speciales në Hagë ndaj ish-krerëve të Ushtrisë Çlirimtare të Kosovës.
Pjesëmarrësit po mbajnë pankarta dhe po bëjnë thirrje në mbështetje të ish-krerëve të UÇK-së.
Protestuesit kanë hedhur mjete piroteknike para Ministrisë duke brohoritur “Liri çlirimtarëve, vdekje tradhtarëve”.
