Presidentja e Republikës së Kosovës, Vjosa Osmani, do të takohet sot me kryetarët e partive politike të përfaqësuara në kuvend.
Takimi konsultativ do të bëhet për caktim të datës së zgjedhjeve të rregullta në Republikën e Kosovës.
Nga Presidenca është bërë e ditur se takimi në fjalë do të fillojë në orën 14:00, në një nga sallat e kuvendit.
Mediat do të marrin pamje nga fillimi i takimit, që më pas do të mbyllet për publikun.
Pas përfundimit të takimit, presidentja Osmani do të mbajë një konferencë për media.
Kujtojmë se pjesëmarrjen në këtë takim e ka konfirmuar PDK-ja, LDK-ja dhe AAK-ja.
Krerët e tri partive opozitare i janë përgjigjur pozitivisht ftesës së Osmanit.
Ndërkaq, lideri i partisë në pushtet, Albin Kurti, raportohet se do të delegojë në takim Glauk Konjufcen.
