Portali evropian “Euractiv” ka raportuar rreth Raportit të Progresit të Komisionit Evropian për Kosovën dhe Serbinë, ku citon pjesë të teksteve që kërkojnë zbatimin e plotë të marrëveshjes për normalizim të marrëdhënieve, ku shtjellohet themelimi i Asociacionit të Komunave të banuara me shumicë serbe si dhe njohja “de facto” e Kosovës nga Serbia.
Euractiv citon një “zyrtar të lartë të BE-së” të cilin nuk e përmend me emër që thotë se “njohja e plotë (de jure, Kosovë-Serbi) është pika e fundit e procesit” dhe se “jemi tepër larg kësaj”.
“Është një gjë tjetër të përgatitësh terrenin [për njohjen], ka disa hapa që e bëjnë njohjen të funksionojë gjatë kohës, si targat e makinave dhe përfaqësimi i jashtëm,” u tha gazetarëve një zyrtar i lartë i BE-së në fillim të kësaj jave, siç e citon Euractiv.
