Ka nisur aksioni për rrënimin e 11 objekteve në zonën përreth liqenit të Ujmanit, pasi sipas Ndërmarrjes Publike Hidroekonomike “Ibër-Lepenc”, ato janë ndërtuar në pronë që i përket kësaj ndërmarrjeje.
Kryeshefi ekzekutiv i “Ibër-Lepencit”, Faruk Mujka, ka bërë të ditur për mediat, se aksioni po realizohet nga Inspektorati i Ministrisë së Mjedisit, pas mosrespektimit të afatit të dhënë për lirimin e objekteve.
Sipas Mujkës, personat që shfrytëzonin këto objekte ishin njoftuar më 3 korrik që t’i lironin dhe t’i largonin sendet e tyre personale, por kjo nuk ndodhi brenda afatit të caktuar.
Ai theksoi se fillimisht do të bëhet largimi i inventarit nga objektet, ndërsa më pas do të vazhdohet me rrënimin e tyre, në kuadër të zbatimit të vendimit të autoriteteve kompetente.
Policia e Kosovës po ndihmon në zbatimin e këtij veprimi.
