Nëse Kosova arrin ta sigurojë pozitën e dytë në Grupin B3 të Ligës së Kombeve, atëherë në mars të vitit 2027 do të ketë mundësinë të luftojë për promovim në Ligën A përmes play-off-it.
Dardanët kanë 55.6 për qind gjasa për ta siguruar pjesëmarrjen në këtë fazë, sipas përllogaritjeve të publikuara, sipas Football Meets Data.
Megjithatë, fillimisht duhet ta përfundojnë grupin në pozitën e dytë, ndërsa më pas do të përballen me njërën prej skuadrave të Ligës A që do të luajnë për mbijetesë.
Sipas formatit të UEFA-s, në këtë play-off marrin pjesë katër skuadra nga Liga A: dy ekipet më të dobëta që përfundojnë në vendin e tretë dhe dy skuadrat më të mira që renditen në vendin e katërt. Atyre u bashkohen katër nënkampionet e grupeve të Ligës B.
Uellsi dhe Kroacia me gjasa shumë të larta për play-off
Sipas përllogaritjeve aktuale, Uellsi është skuadra me gjasat më të larta për të përfunduar në play-off-in A/B, me 99.7 për qind. Pas tij renditet Kroacia me 95.2 për qind, ndërsa Norvegjia ka 70.6 për qind.
Serbia vlerësohet me 63.1 për qind, Çekia me 25.8 për qind dhe Turqia me 16.2 për qind. Në anën tjetër, Gjermania ka 10.7 për qind, Danimarka 9.3 për qind, Greqia 6.3 për qind dhe Belgjika vetëm 3.1 për qind.
Këto përqindje tregojnë se Uellsi, Kroacia dhe Norvegjia janë aktualisht në pozita shumë më të rrezikuara, ndërsa disa prej emrave të tjerë varen nga rezultatet e ndeshjeve të fundit.
Bosnja e Hercegovina e sigurt, Kosova me 55.6 për qind
Edhe në Ligën B gara për katër vendet që dërgojnë në play-off-in A/B është interesante.
Bosnja e Hercegovina tashmë e ka siguruar pjesëmarrjen, me 100 për qind gjasa. Pas saj vjen Sllovenia me 81.4 për qind, ndërsa Kosova renditet me 55.6 për qind.
Irlanda e Veriut ka 50.3 për qind, Hungaria 49.7 për qind dhe Irlanda 44.4 për qind. Në anën tjetër, Skocia ka vetëm 8.7 për qind gjasa për të përfunduar në këtë fazë.
Kjo tregon se gara për dy vendet e mbetura është ende e hapur dhe ndeshjet e fundit do të jenë vendimtare. Për Kosovën, sfida ndaj Irlandës ka rëndësi të veçantë, pasi një rezultat pozitiv do t’i ndihmonte Dardanët ta siguronin pozitën e dytë në grup.
Cilët mund të jenë kundërshtarët e Kosovës?
Duke u bazuar në përqindjet aktuale, Uellsi, Kroacia dhe Norvegjia janë emrat që duhen përcjellë më shumë në Ligën A. Në listën e skuadrave që mund të përfundojnë në këtë fazë janë edhe Serbia, Çekia, Turqia, Gjermania, Danimarka, Greqia dhe Belgjika.
Megjithatë, kjo nuk do të thotë se të gjitha këto përfaqësuese mund të jenë kundërshtare të Kosovës. Përveç faktit se vetëm katër skuadra nga Liga A do të kualifikohen në këtë play-off, duhet të merren parasysh edhe kufizimet e shortit.
Play-off-i do të zhvillohet me sistem vajtje-ardhje në mars të vitit 2027. Kosova, në rast se e siguron vendin e dytë, do ta zhvillojë ndeshjen e parë në shtëpi dhe të kthimit në udhëtim.
Për momentin, Dardanët duhet të përqendrohen te sigurimi i pozitës së dytë, ndërsa emri i kundërshtarit do të mësohet pas përfundimit të të gjitha ndeshjeve dhe shortit përkatës.
