Presidenti amerikan Donald Trump ka premtuar një marrëveshje të re sigurie për Ukrainën, e cila “mund të përfshijë të gjithë Evropën”, pas takimit të së enjtes me një të dërguar të nivelit të lartë rus. Megjithatë, propozimi përmban pak detaje dhe ka lënë të paqartë qëndrimin e kryeqyteteve evropiane.
“Do të jetë një marrëveshje shumë e madhe. Ajo do të përfshijë më shumë se vetëm Ukrainën dhe mund të them madje se mund të përfshijë të gjithë Evropën. Do të jetë një marrëveshje e madhe dhe fantastike, dhe të gjithë do të jenë të kënaqur”, u tha Trump gazetarëve të enjten, pa dhënë hollësi të mëtejshme, shkruan A2CNN.
Presidenti amerikan, i cili në disa raste të mëparshme ka premtuar arritjen e një marrëveshjeje për t’i dhënë fund luftës në Ukrainë, i bëri këto komente pas takimit me Kirill Dmitriev, drejtuesin e sanksionuar të Fondit Sovran të Pasurisë së Rusisë, i cili shërben gjithashtu si i dërguar i presidentit rus Vladimir Putin.
Edhe dhëndri i Trump, Jared Kushner, publikoi të enjten një deklaratë në rrjetin social X, ku argumentoi se nevojitet “një arkitekturë më e gjerë evropiane e sigurisë” për të adresuar shqetësimet e sigurisë të të gjitha palëve, për të zvogëluar rrezikun e konflikteve të ardhshme dhe për të krijuar një mjedis sigurie më të qëndrueshëm dhe më të parashikueshëm
